【非一般旅程】黑幫殺手坐獄後旅遊KOL 日日爆團遊覽黑幫景點
撰文：林通賢
出版：更新：
去旅行去到盡，不過應該無人有《非一般旅程》(Dark Tourist)的主持David Farrier咁盡，喺節目中David帶大家向世界出發，不過唔係教大家飲飲食食或者邊到打卡呃like，而係去一啲你估唔到，但又勁想去嘅地方，好似去印尼睇清洗木乃伊，或者參觀全球最恐怖樂園Mckamey Manor感受死亡，首集帶大家遊南美已經好過癮，尤其墨西哥，當地出名多毒梟，幫會仇殺，但估唔到原來呢個係旅遊商機，仲攪埋毒品之旅，表演「殺人」，更加估唔到攪呢個旅行團係一個殺過２５０人嘅黑幫殺手。
Popeye是艾斯高巴（左）的心腹亦是御用殺手，為他殺了250人。
John Jairo Velásquez 綽號Popeye當年係哥倫比亞大毒梟Pablo Escobar的御用殺手，為大佬殺過２５０人，亦坐過２２年監，估唔到而家變咗墨西哥旅遊KOL，除咗開埋Youtube 頻道講自己「威水史」，亦攪埋local tour，旅程就係當年墨西哥毒梟出沒嘅地方，邊到殺人，大佬別墅有幾奢華，Popeye仲做埋導游聲音導航，不過最抵死係Popeye每次旅程都有助慶表演，就係重演佢當年點殺人，每次旅程都會揾拍檔做場大龍鳯俾旅客睇，雖然場戲好簡單，Popeye同個媒講兩句，就搶殺對方，但由於Popeye以前真係殺手，就算做戲都好迫真，連主持睇到都驚。
當年殺人如麻，而家變咗Youtuber，幾乎日日拍片，認真估唔到。
毒品之旅有乜玩？可以睇以下圖輯
+3
除了毒品之旅，David亦帶大家參加偷渡，究竟由墨西哥偷渡美國會遇到咩危機？原來呢個又係local tour，全程６個鐘，經歷被搶劫，山賊，仲要爬山，最精彩係尾段，又差人出現，仲會將你壓喺地下拘捕你，當然全部都係演員，所經歷嘅都係目的原來係話俾人聽偷渡係沒有好結果，嘩，原來咁有教育意義，盛惠５０美金一個人，近年無綫都好鍾意攪旅遊節目，唔知會唔會參考下呢？
墨西哥模擬偷渡美國，究竟有咩玩？看以下圖輯
+3