【演嘢會】陳志雲重提貪污事件 王喜：佢每次綵排都會喊
撰文：吳子生
出版：更新：
陳志雲與王喜這對難兄難弟，聯手炮製《志雲尋志雲登陸舞台演嘢會》，共開四場，今晚最後一場，請來特別嘉賓有古巨基、謝安琪等，現場坐無虛席。
兩兄弟在舞台上「唱雙簧」，王喜話：「TVB是非多，阿姐多，係收視唔多，珍姐（曾勵珍）細過阿姐(汪明荃)四年，又叫阿姐。」志雲反問王喜知唔知道TVB最多係咩？「TVB最多總經理。」王喜續說：「如果想搵總經理需要一層cc一層cc咁email出去，舞台上銀幕出現「CCTVB」，全場歡呼拍難手掌，志雲續說：「商台只得一個總經理，一個打佢哋咁多個。」令台下觀眾啼笑皆非。
志雲多謝身邊曾經幫助過佢每一位天使朋友（吳子生攝）
今晚「演嘢會」完滿結束，兩人被問到功成身退心情感受如何？志雲指著王喜笑說：「佢最開心，可以唔使再見到我，佢覺得見到我好厭，琴晚食宵夜唔坐我隔離，嫌見得我太多。」王喜笑說：「哈哈，係好厭，係好討厭，但無冇辦法，過去個幾月，密集式嘅訓練，又要背台詞，訓練一啲細節位嘅時候，用盡畢生所知所聞去做，將件事做好，係非常艱苦嘅訓練。」
陳志雲多謝好兄弟王喜，不離不棄（吳子生攝）
陳志雲每次演出都會重提昔日貪污事件，細說當時傷心難過的日子，每次都忍不住落淚痛哭。王喜直言：「其實今晚完咗，戥佢開心，睇返嗰84個月裡面，有天使就開心啫，有好多日子裡面冇天使，仲有好多頂心頂肺啲嘢，每晚佢都會重溫一次畀觀眾睇，我覺得佢強迫緊自己，佢要有好強大嘅心智先會克服得到，每次採排佢都會喊，所以我覺得都幾折磨佢。」志雲續說：「我覺得呢成個演出，好似為我84個月嘅生活片段劃上一個句號，因為我一路都冇機會多謝身邊每一個天使。」