【任噏亂評】嚴選5位最有觀眾緣TVB藝人 邊個可以避開網民怒罵？
喺香港，你要做一個藝人唔難，做Model、考訓練班、做KOL等等的方法都可以讓你一躍升龍門，只要你有真材實料又有進入娛樂圈嘅心，總有一個途徑幫到你。但即使做到一個藝人，你要個個觀眾都鍾意你，就相當困難！唔好講個個鍾意你，就算只係唔憎你，對你無乜感覺都好難！而家呢個網絡發達的年代，藝人們每做一件事都會被無限放大，而且網民對你並不會手下留意，一鬧就有咁難聽得咁難聽。
TVB，這個在香港屹立多年的電視台，近年被網民不停鬧，鬧佢不思進取，鬧佢一成不變，鬧佢愈來愈低質，好似TVB已經成為了原罪一樣。而作為TVB的藝人，更加容易被網民憎恨，所以今次決定搵5個雖然係TVB嘅當紅藝人，但一路都十分有感觀緣，而且網民會為他們大講好說話，究竟有邊5個可以咁叻呢？
第五位 黃智雯
當年Mandy一出道，以一個眼鏡娘的型象示人，嗰陣網民們都話佢戴眼鏡好正，所以一早已經得到網民嘅喜愛。直到除咗眼鏡後，演技又跟住上升，漸漸成為TVB嘅後選花旦，踏入咗幾年嘅二線女角色檔期後，在上年《雜警奇兵》和《降魔的》之後，有不少網民大讚佢演技突飛猛進，加埋今年《三個女人一個「因」》，直情被捧為視后大熱人選。而佢個人亦都無乜負面新聞，戀情上喺同圈外男士，之前傳過分手，不過都無乜人拎呢單嘢炒作，算係咁！
第四位 麥美恩
Mayanne係透過選港姐入行，到得第四名之後決定在TVB娛樂新聞台發展，之後慢慢向主持之路出發，最出名當然是《學是學非》。其搞笑兼大情大聖的形象得到網民讚賞，認為她是比較沒有機心和純真的藝人，而Mayanne的人氣亦因為做主持而慢慢累積，在TVB亦開始會做大騷的司儀。而她亦甚少負面新聞，不過在最近《big big channel 大公司周年慶》入面，就被指太嘈，但相信都是因為big big channel的問題才會被網民鬧兩句。
第三位 朱千雪
Tracy當年選港姐時，在民意上是大熱的冠軍，可惜最終全民投票的環境竟然遇上伺服器發生問題，最終只得季軍，剩係呢單嘢都已經被網民大感可惜，由出道到現在一直都是網民的寵意。能夠得寵當然不是一個意見咁簡單，Tracy是美貌與智慧的代表，靚得嚟又不停追求知識，而家又進修緊法律博士學位。最重要的一個因素是，2014年的《EU超時任務》將Tracy的人氣推上高峰，除了劇情催化之外，其演技亦得到了網民的認同。
第二位 馬國明
馬明於1999年加入訓練班，在TVB已經有19年的歷史，在呢接近20年的時間，一直都沒有負面新聞，更加是緋聞的絕緣體，網民形容為他是「TVB毒男」。當年《On Call 36小時》飾演「一件頭」而大受歡迎，可惜未能封視帝，到上年《降魔的》亦被網民大舉追捧，可惜最終都只係得到「最受歡迎電視男角色」。而馬明的「天然呆」照片大受網民歡迎，在訪問上直言自己會睇AV亦得到網民大讚坦率。
第一名 李佳芯
Ali拎第一名相信唔會有人異議，貼地嘅Ali出身不是富有，畢業後做過Model，由有線轉投TVB時已經30歲，當時網民好似先發現娛樂圈有呢個人，紛紛搵返佢喺有線做主節目嘅相同片段，大讚Ali好靚。而最令Ali出位的時間，當然是2年前《巨輪II》被吳岱融大叫「臭雞」一幕，自此便吸引到網民的注意，慢慢開始，Ali每套劇都有人追捧。除了讚她演技開始進步，靚樣之外，Ali還有一個男友叫陳炳銓，同樣是圈內人，網民稱呼他們是「美女與野獸」。亦因如此，Ali被網民讚揚「唔係睇樣」嘅女仔，認為呢種女人娶得過。