《深夜美食團》黃愷怡自嘲唔識食好西 最想挑戰拍寫真
撰文：賴家杰
出版：更新：
黃愷怡（Jasmin）今日（24日）下午時份出席由佢主持嘅綜藝節目《深夜美食團》記者會，記者會期間Jasmin更與余思霆大顯廚藝，不過小編見到佢哋煮嘅炒飯望到都驚，因為佢哋不停將調味料加落去，可想而知有幾恐怖。問到啱啱炒飯都有少少雞手鴨腳嘅情況發生，Jasmin唔覺得自己煮得唔好，仲覺得幾好，更反問記者覺得點，「我知道監製佢哋鍾意重口味，所以我瘋狂落鹽及豉油等，你未試過所以唔知道係好食，不過今次的確係第一次煮炒飯。」對於廚藝方面Jasmin直言煲飯比較多，今次係第一次炒飯。
黃愷怡（Jasmin）今日（24日）下午時份出席由佢主持嘅綜藝節目《深夜美食團》記者會。（葉志明攝）
講番今次節目一眾主持四處尋覓極品美食介紹畀觀眾，Jasmin自己都十分喜歡食呢件事情，不過佢自問自己就唔係一個食得好「刁鑽」嘅人，「譬如話賣八頭鮑嘅鮑魚，賣萬幾銀，可能我覺得唔係最好食，反而我食啲餃子先覺最好食，所以佢地都會話我唔識食。」對於不停食食食嚟講Jasmin已經有少少內疚，因為食肥咗，不過佢直言唔怕肥，「都要減肥嘅，唔肥又點減呢？打拳減肥啦。」
Jasmin今日大秀廚藝，我呼籲大家千奇唔好嘗試。（葉志明攝）
近年一直做主持嘅Jasmin累積咗唔少做主持嘅經驗，曝光率亦多咗，但佢自己覺得仲有好多不足之處，「其實今次拍呢一個節目主持有張秀文同崔建邦佢哋，佢哋真係經驗豐富，所以係佢哋身上學到做主持嘅經驗。」亦問到除咗做主持之外仲會想嘗試邊方面工作？Jasmin透露想拍劇外仲講咗一件事情想做，相信大家都估唔到，「下年又做下KOL又或者影寫真啦」原來Jasmin指嘅寫真，係影一啲文青少少嘅生活照，簡單來講其實係圖文集，想挑戰做才女，「如果自己真係出寫真嘅話，驚大家睇咗會反胃。」
+1