趙希洛入行10年 終獲賞識做親生女:公司終於見到,係一個新開始

撰文:
最後更新日期:

趙希洛表示無論係未大台親生女,都一樣咁努力工作。(資料圖片)

大台藝人一個接住一個完約後離巢,單係呢幾個月就先後有岑麗香同林夏薇,不過,舊嘅唔去新嘅又點會嚟呢!有消息指現年23歲嘅江嘉敏以及被網民封為「無綫御用癲婆」嘅趙希洛趁機上位,8月開始正式轉做親生女。

趙希洛在《天命》中飾演白蓮教教主,她表示自己可以做得再好啲。

趙希洛07曾參選港姐,雖然於五強止步,但她隨即加入無綫藝員訓練班,多年來一直飾演閒角,直到《超能老豆》終於榮升第二女主角,及後在《乘勝狙擊》則飾演千面女郎蘇麗芬,不時大晒身材益觀眾。趙希洛接受電話訪問時,對於轉簽做親生女一事,第一個反應係:「嘩!又會咁快知嘅!點解會知嘅!我無同人講過架。」她承認已成為親生女,但就不肯透露合約內容以及有否加薪,問到是否樂小姐親自出馬,趙希洛就話都係人事部同事負責聯絡:「不過佢哋有話係樂小姐想搵我。」

趙希洛話媽媽對佢嘅演技無乜評價,話得佢最多就係「肥」。(ig圖片)

入台10年正式做親生女,趙希洛表示感覺不大,笑言「一係簽一係唔簽」,並謂向來都不強求做親生女。「我唔係起步就已經有運,所以一直都好努力咁工作,依家想中文再好啲,同埋用心做每件事。」她又表示除了拍劇之外,最想嘗試能講英文的角色,因為這對鬼妹仔的她有一定好處。趙希洛早年於英國大學讀法商科,爸爸經營石油生意,媽媽則為前資深藝員梁小玲,有指父母對她入行十分反對。如今獲樂小姐點名簽做親生女,是否對父母有所交代,趙希洛表示仍未通知父母。「係做到啲成績,咁多年努力公司終於見到,亦可以話係一個新開始。」
 

江嘉敏去年曾被公司輕度雪藏,但溶雪後即轉做親生女。(資料圖片)

而去年因《親親我好媽》而知名度大增的江嘉敏,雖然有傳佢因拍加入大台前,曾參與ViuTV劇集《三一如三》而激嬲方仗被擺入雪櫃,但事件好快就過告一段落,且公司力捧,於新劇《兄弟》更擔正做女一。對於被簽做親生女一事,江嘉敏接受電話訪問時就話:「我一入嚟就已經係親生女。」問到她最近可有做續約的動作,佢就話:「我諗你短期內都會喺呢間公司見到我」並再三強調自己係「一入嚟就已經係親生女。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。