《BB來了》今日（1日）晚上舉行祝捷晚宴，劇中主角黎諾懿及李佳芯（Ali）亦有出席，《BB來了》播出後平均收視達到30.2點，今個星期已經到結局週，一眾演員也不捨迎接結局來臨，在台上的演員更希望會有續集。諾懿當然希望可以與Ali再度合作：「自己冇諗過第一次同Ali合作已經有咁好嘅成績，如果再開續集我希望係會有大多少少嘅小朋友，今次我覺得豬豬太細，始終驚佢太累，所以拍攝時間都比較短，如果大少少會有連貫加拍攝時間會長番少少。」

但續集會係點呢？Ali講到：「允豬上學了、允豬拍拖了、允豬結婚了。」諾懿在旁笑說呢一個系列可以拍到大家都變老。之後Ali會飾演外母呢一個角色？Ali直言會飾演番成年版允豬：「當然要留番一個角色畀自己啦。」諾懿指咁你要搵番一個我咁嘅男朋友先可以。問到Ali會覺得自己飾演咩年紀嘅允豬呢，佢話當然係18歲到48歲都冇難道，但諾懿又忍唔住爆一句笑Ali智商都係得20歲。

最近網民喺網上發佈番Ali初初入行時候嘅照片，唔知Ali會唔會都唔敢面對番以前時候嘅照片呢？Ali笑言：「冇乜所謂啦，起碼我冇俾人話整容先啦。」諾懿雖然話自己冇睇過Ali以前嘅照片，「Ali由八歲就靚到而家，呢一點我肯肯定。」