陳奕迅續約 自稱寶麗金Fans連鄭嘉穎唱片都唔放過

撰文:
最後更新日期:

啱啱過完44歲生日的歌神陳奕迅喺今日〈3號〉舉行記招宣布續約環球唱片。擔任大會司儀的鄭丹瑞〈旦哥〉就透露喺1995年曾為新秀歌唱大賽擔任主持,記得當年係一位「略帶脂肪」的小鮮肉奪冠,而23年後呢位「略帶脂肪」的小鮮肉就成為超級巨星─陳奕迅。

旦哥話Eason每次重要嘅日子都會邀請自己。〈網上截圖〉

 

喺呢個咁重要嘅日子,Eason都忍唔住有啲感觸講到:「多謝你哋咁多年入面都一直咁支持陳奕迅,我哋一齊經歷咗好多…喜怒哀樂,你知我啲脾氣又唔係特別好,雖然亦都可以好開心,亦都可以好唔高興。雖然好多人覺得你都做咗咁多年啦,但其實我都好緊張,因為我好重視今日,同埋呢幾年大個仔咗,囡囡又大咗,上有老下有嫩,屋企又有隻領養返嚟嘅狗仔。好似越嚟越多責任 ,不過我抱住好積極,未來會有好多好開心嘅嘢。希望大家繼續同我一齊過以後嘅日子,好多謝大家。」

Eason2004年加入環球唱片。〈網上截圖〉

當旦哥問到今次續約有咩新嘅優厚條件?Eason就話同公司合作咗14年,仲話自己一直對「寶麗金」呢個唱片公司好有情義結。Eason講到:「嗰陣我係簽咗新藝寶〈曾為寶麗金唱片及新藝城電影(於1990年代初退出)的合資附屬公司〉,新藝寶係我一直好渴望加入,我由細到大買得最多嘅唱片就係寶麗金,我係寶麗金fans,無論係校長、學友、黎明、周慧敏、關淑儀、草蜢呀,甚至鄭嘉穎嘅碟我都有買〈咩叫甚至?咩意思〉千奇唔好誤會,因為佢嗰陣啱啱出嘅時候係棒球小子。甚至嘅意思係因為佢係一個新人,係未有人識,我唔理咁多,我會買。〈陳奕迅已經好欣賞鄭嘉穎〉佢ok,佢明,所以無論咩寶麗金嘅出品我都會買。」

Eason當年都係聽鄭嘉穎嘅歌大!〈圖片來源:視覺中國〉

最後,Eason同環球唱片大中華區總裁裁暨執行長張松輝先生以及經理人甘菁菁喺大家見證下完成的簽約儀式,為了祝賀Eason續約,張松輝先生將Eason歷年來嘅唱片做成純金唱片送俾Eason,象徵佢多年努力,期待公司同Eason一直走下去。

Eason唱片銷量驚人〈嬝上截圖〉

同一日,Eason亦宣布自家音樂製作公司Eas Music將會簽下郭偉亮成為旗下藝人。Eric Kwok亦喺台上笑言原因只有一個:「Eason想幫朋友。」但當被旦哥問到睇中Eric Kwok啲咩時,Eason就稱:「Eric係我心目中Top5嘅香港男歌手之一,好欣賞佢嘅才華。」

兩位真係手足悄深。〈網上截圖〉

Eric又同Eason同經理人甘菁菁喺大家見證下完成打手印儀式,張松輝先生亦送上金球拍俾Eric,象徵大家一拍即合。但Eric就問張松輝先生有份簽自己會否後悔,張松輝先生亦回應:「永不後悔!」

Eason仲話要幫Eric開拓國語市場。〈網上截圖〉



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。