陳小春再同Jasper亮相《爸爸去哪兒6》：佢好想再玩呢個節目
撰文：賴家杰
出版：更新：
陳小春周一（6日）現身西貢片場為新歌《Stop angry》進行拍攝，點解會叫呢個名？就係上年《爸爸去哪兒》小春兒子Jasper同小春講咗一句：「Stop angry」所以令到呢一首歌出現。現場更有爆破場面，原來爆破背後亦有一個含義，小春解釋：「因為好多時有啲脾氣要忍忍，當然要爆嘅就爆，不過唔好當面爆而要喺後面爆，嗰個憤怒又好情緒又好，千奇唔好係小朋友面前，我已經學識咗，唔好令到小朋友驚咗自己。」聽落小春因為Jasper收起自己火爆嘅性格，不過小春笑說自己仲係學習做爸爸階段。
陳小春新歌《Stop Angry》呢個名字起因，全因兒子一句Stop Angry而出現。（梁碧玲攝）
小春同Jasper再度出發拍攝《爸爸去那兒》第六季，早前去到青藏海拔高源拍攝，小春更喺社交網站發佈一張要帶氧氣罩照片，拍攝過程係咪好辛苦？小春指以前去5千6千米都冇乜特別，講番今次感受：「今次由0殺到上4千幾米落飛機，條氣有少少唔順，發生咩事呢？然後整整下吸咗氧氣食埋當地嘅藥就冇事了。」但今次拍攝帶埋Jasper去，好多網民覺得Jasper好辛苦好慘。小春直言：「小朋友通常就唔會有高山反應，佢唔辛苦，佢成日住係城市，未睇過出面世界發生乜事，有機會去睇下，加上佢放暑假Ok嘅。」小春慨嘆最辛苦嗰個係佢，因為拍完仲要幫囝囝沖涼洗面一腳踢。
小春之前拍攝《爸爸去那兒》去到青藏海拔高原拍攝，佢直言最辛苦係佢，因為又要照顧埋Jasper。（梁碧玲攝）
有報導指小春今次以3500萬人民幣天價接拍接下工作，對於酬勞方面小春完全唔知道幾多：「我唔知道幾錢，呢啲唔係我傾，我夫人去傾，唔係話完全係價錢問題，咁Jasper又好想再去玩呢個節目，節目組又搵番佢，咁咪當放下暑假。」
問到應采兒擔唔擔心小春照顧唔掂Jasper？小春笑言上次拍節目都係我照顧，冇問題。（梁碧玲攝）
《爸爸去哪兒6》未知幾時上映，睇住劇照先啦
+2