【喜歡妳是妳】談善言自稱「萬年學生」 楊偲泳首次擔正女主角
撰文：賴家杰
出版：更新：
電影《喜歡妳是妳》今日（10日）舉行開鏡儀式，劇中一眾主要演員亦有出席，包括：談善言、楊偲泳、歐錦棠、韋家雄等。電影主要圍繞兩位女主角，分別係談善言及楊偲泳，故事講述二人成長階段，一起面對嘅事，偲泳更講到戲中會發揮超出友誼嘅事情。
電影《喜歡妳是妳》今日（10日）進行電影開鏡儀式。（賴家杰攝）
超出友誼關係會令人聯想兩位女生攬攬錫錫嘅場面，偲泳直言呢一Part又唔會有好多：「有親密行為，但戲中我哋飾演學生，所以戲中係尋找最真實嘅感覺。」問到今次戲中二人是否第一次飾演女一？偲泳坦言今次係第一次擔正：「做女一會好緊張，不過身邊有佢（談善言）陪住我，佢真係幫到我好多，所以有好多時候同場嘅感覺好熟悉，冇咁大嘅壓迫感，好安心好安定做番自己。」而談善言笑言自己唔係第一次做女一，今次更係第三次飾演學生，被人笑做「萬年學生」。
談善言今次已經第三次飾演，俾人笑「萬年學生」。（賴家杰攝）
戲中二人更會和其他男生發展感情線，偲泳怕唔怕男朋友會妒忌？偲泳表示：「呢啲已經過咗去啦，最緊要我哋宜家拍呢套戲拍得開心，希望大家多多留意我哋呢套電影。」言下之意偲泳而家單身？談善言在旁搶著回答：「佢有我又點會單身呢？」而偲泳笑言阿談而家係佢伴侶。
楊偲泳默認單身。（賴家杰攝）