蔡思貝被拍得同外籍人士密密傾：講得開心就會咁

蔡思貝（Sisley）今日（16日）以一身運動裝扮出席運動品牌活動，Sisley出場時候由一眾舞者帶領，可惜係Sisley並冇現場大秀舞技。Sisley解釋並唔知道要跳舞：「其實俾咗一個驚喜我，可以喺現場舞動一下，岀一身汗，但當然專業舞者面前我要謙虛啲，唔好岀醜。」有留意Sisley嘅粉絲就會知道，Sisley十分熱愛運動，Sisley直言運動係佢嘅快樂泉源：「我從運動中得到好多舒緩同快樂，對我嚟講係享受，除左鞭策同督促自己之外，係一種玩樂，所以我十分喜愛做運動。」
 

Sisley本身熱愛室外運動，奈何室外做運動自然會曬黑，雖然Sisley透露自己本身唔怕曬黑，不過做演員之後唔可以令自己曬黑，「始終做演員係鏡頭面前，可能身邊女仔比較白，就會難打燈一啲，所以我自己要取捨一下。」講到室外運動，早幾日Sisley同王君馨加上一班朋友去沙灘遊玩，被爆出當日與一名外籍男子傾得火熱，懷疑Sisley有戀情，Sisley坦言希望有新戀情：「其實冇，純粹一個聚會，大家去沙灘游水同食飯，交流一下心得姐，至於話密密傾，其實講開心得，自自然然會滔滔不絕㗎啦。」其實Sisley入行到現在緋聞一直冇停過，每次同男性有接觸亦會被好快傳出緋聞，呢一方面Sisley會想避忌？Sisley回應從來都唔會有呢個想法：「朋友交流姐，我覺得譬如運動係我快樂泉源，其實朋友都係我快樂泉源，所以朋友方面都唔可以缺少。」

問到Sisley有冇再去探望余德丞，Sisley表示：「宜家唔會啦，知道佢醒咗，畀佢休息一下。」而余德丞嘅康復程度係點呢？Sisley就指大家知道幾多我就知道幾多，顯然唔太想回答。余德丞入院事件後，Sisley會唔會更加珍惜二人之間關係？因為二人早前拍旅遊節目傳出緋聞，Sisley強調同余德丞係好好朋友：「好朋友，好拍檔，我等佢好番再一起去開拍旅遊節目，一起大玩特玩。」