鄭秀文稱Side Track音樂會意義重大 「但我淨係想做一場喎」
撰文：朱奕錦
出版：更新：
苦等兩年，鄭秀文（Sammi）的全新廣東大碟「Believe in Mi」今日（17日）正式上架，剛剛一出便大獲全勝，登上iTunes大碟磅第一位，都咪話唔犀利呀！
今次是Sammi首次穿泳衣拍攝專輯封面，大家都覺得好sexy，Sammi笑言：「一件頭我覺得OK嘅，冇咩嘢嘅，咁嘛三點式就話啫。」難道大膽嘗試，難怪安仔都激讚太太啦：「咁都應該嘅，冇飯食嘅喎，幾危險！」
Sammi的全新廣東大碟剛剛上架便登上iTunes大碟榜第一位，相當犀利，除了收錄兩隻新歌之外還有精心挑選的side track歌曲。（陳順禎攝）
今個星期日就係Sammi 46歲生日，疼錫歌迷的她今次特登開一場Side Track音樂會和Fans一齊慶祝：「其實聽日會去澳門Rehearsal，嗰音樂會專唱我咁多年嚟Side Track嘅歌囉。」雖然正日不能同安仔一齊過，不過Sammi表示老公非常支持自己：「佢知道我好愛工作，同埋呢個音樂會對我嚟講意義好大，因為好多年都好想做呢樣嘢，但我自己淨係想做一場喎，咁又要搵啱嘅場地啦，又要編排啲歌呀，咁其實都做咗好多好多嘅功夫囉。」Sammi直言好多謝公司的配合。
Sammi即將啟程澳門開Side Track音樂會，與一班fans同樂，她也非常感謝公司對這次活動的支持。（陳順禎攝）
講到生日禮物，日前安仔出席活動時就表示想織件冷衫給Sammi，不過她就暫時未見到「真身」，但Sammi透露，原來安仔真的識計針數：「叻過我先啦，起碼知咩高低針，我做唔到，唔係好識呢啲嘅，咁……織得出先算啦！」言語間愛意滿滿。至於生日願望，Sammi就覺得身體健康最重要：「雖然好老套，但係我覺得你無論做乜嘢，順意或者唔順心，如果有一個健康嘅身體，你都有足夠能力去應付啦；第二就話嗰心境時時開朗囉，同埋我希望來年多啲機會去幫助其他嘅生命，譬如有啲人有Depression呀，或者有啲人解決唔到心理上嘅問題，我會拎多啲時間去關心身邊嘅人囉，因為我覺得實在太重要啦。」
Sammi今年的生日願望是「身體健康」，希望來年可以有更多時間關心身邊人。訪問結束之後，大家齊齊唱生日歌，為Sammi送上祝福，令她相當感動，所以順勢祝大家「發財大旺」！（陳順禎攝）