林欣彤聲帶勞損養傷待年尾演唱會 「用唔到把聲係好慘」
撰文：林迅景
出版：更新：
林欣彤（Mag）今日出席香港電台的「太陽計劃2018」畢業禮，平日已經表現活躍「滿場飛」的Mag，今日卻十分安靜，原來她聲帶勞損「講唔到嘢」，其後Mag接受訪問時也只能用極細聲的聲線說話。「我係勞損咗成年，所以好難一下子好返。（把聲）本身已經係勞損咗，我唔理繼續勞損，繼續做繼續練繼續唱繼續講嘢，結果佢就勞損再加勞損咗一年，所以我宜家要還。」
訪問時阿Mag都要細細聲講嘢。（林迅景攝）
Mag表示醫生也勸喻她要休息。「醫生話把聲起碼幾個月先會好返。（呢段時間唱唔到歌？）可以唔唱就唔唱，但係有啲都要捱埋佢。因為唔止係痛，痛都可以捱，而係會更傷，而年尾就係演唱會。其實幾年前都試過，用唔到把聲係好慘，好多人都經歷緊呢件事，或者係個天想我感受到佢哋有咩困難。」
聲帶受損真係慘，希望阿Mag快啲好返啦。（林迅景攝）