【延禧攻略】順嬪張嘉倪美絕登場　傅恆：魏瓔珞妳以後該怎麼辦

70集《延禧攻略》於內地即將進行尾聲，正當大家以為一眾後宮嘅地位已塵埃落定之時，原來仲有位容妃（順嬪）要出場！做得壓軸「嘉賓」，順嬪當然有返咁上下技倆。於野史中，順嬪正正就係乾隆後期最寵幸嘅「香妃」，入宮第一日就已被翻牌，其後又為佢搭建保月樓，又批准佢唔使遵守後宮禮儀，乾隆又會攬住佢散步，足見寵溺程度…而於劇集中，順嬪一出現，即時令到身為皇后嘅佘詩曼都大為緊張，更主動拉攏敵對關係嘅瓔珞(吳謹言飾）聯手合作，而傅恆亦因為順嬪有齊「美麗、忠誠、謙遜、正直、勇敢」特質而為瓔珞感到擔心，一句「這樣一個女人在皇上身邊，魏瓔珞妳以後該怎麼辦？」完全突顯順嬪的威力，並勸佢早日同乾隆和好如初。

飾演順嬪嘅張嘉倪早年因瓊瑤嘅《又見一簾幽夢》走紅，清純亮麗令佢擁有唔少fans。2015年，張嘉倪因為要生B要暫停演藝事業，《延禧攻略》作為產後首部作品，唔少劇迷都表示期待，但由於遲遲未見現身，令到大家都以為戲份被刪減，搞到張嘉倪要自己出來安撫民心。劇中深得乾隆寵幸嘅張嘉倪，現實中亦深得老公買超寵幸，有傳買超係大型婚禮活動策劃公司的執行董事，與富二代王思聰十分要好，可見身份非富則貴。