劉德華演唱會林嘉欣劉心悠齊點唱 古天樂揀歌勁偏門

撰文:
最後更新日期:

劉德華年尾嘅演唱會,開足廿場都一票難求。

劉德華紅館個唱將於12月開鑼,早前信用卡預訂廿場演唱會一日之內已全部售罄。唔止粉絲歌迷要撲飛,就連眾多藝人都萬分期待,當中包括古天樂、林嘉欣、衛詩雅、吳卓羲、顏卓靈、劉心悠、陳家樂、周秀娜、胡子彤、吳肇軒以及廖子妤,群星為了在今次演唱會可以聽到心目中的好歌,都紛紛點歌,甚至大展歌喉,模仿華仔招牌動作唱腔瞓身演出。

周秀娜最想聽《無間道》,不過聽住音樂好似一路搵唔到啱嘅位開始唱,最後放棄。

林嘉欣最愛《如果我有事》,每次聽都諗起電影情節好感動。

華仔多年來唱過唔少經典金曲,一班「星級」粉絲都各有心水,好似林嘉欣最愛《如果我有事》:「可唔可以唱曬男女版呀?因為套戲真係好深刻又好好聽,聽親都好似催淚彈。」另一位女神劉心悠就希望聽到《忘情水》,仲曝露年齡秘密:「記得小學時一返到屋企,就將錄音帶放入機不停聽不停聽。」至於古天樂嘅心水就真係偏門啲啦,佢希望華仔唱《南音》:「《神雕俠侶》裡面華哥做咗神雕大俠之後,其實唱咗首《南音》,大家可能無咩印象但我就好深刻,因為我都做過《神雕俠侶》嘅楊過呀嗎,有親切感。」

劉心悠就希望聽到《忘情水》

古天樂揀嘅歌真係好偏門。

不得不提嘅仲有陳家樂,佢等咗多年終於同偶像劉德華合作,拍攝電影《掃毒2》,仲漏夜買底褲,將華仔嘅《暗裏着迷》MV經典還原,由於華仔輪廓比較深,所以化妝時家樂會特別加深鼻骨同顴骨陰影,「放飯時間,妝都冇落,就咁除咗個假髮就去食飯,食食吓,隔離枱誤認咗我係劉德華,勁開心,哈哈。」除此之外,家樂話最難忘係MV尾段淋花灑部份,「我哋係拍咗呢part先,因為預咗唔會一take過ok,所以團隊都準備咗幾套衫俾我替換,但我自己唔記得預備底褲,所以拍完淋花灑後,同事就要漏夜跑去便利店幫我買底褲,然後先可以落街拍,真係辛苦晒。」

大家又覺得陳家樂扮華仔似唔似呢?

+2
+2
+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。