【Sweet爆】Ming仔神秘求婚計畫令女友肯嫁 拍拖8年條橋度足8年

撰文:陳栢宇
出版:更新:

YouTuber Ming仔(梁嘉銘)早前在加拿大多倫多向拍拖8年的女友Debbie求婚,最近他便在社交網站中分享片段,向網友公開整個求婚過程。片中,Ming仔趁住Debbie從香港飛到多倫多出席友人婚禮,便在女友不知情的狀況下,偷偷地在對方出發之後一日飛到多倫多準備求婚,因為怕Debbie的朋友見到他的蹤影,所以他不敢在市區出現,只敢匿在表妹於市郊的家中暫住。

到了8月8日的求婚當天,已有全盤計畫的Ming仔便先叫朋友引Debbie到他們相識的廣場,然後再讓扮成街頭表演者的另一位朋友,向Debbie用英文讀出開場白,大意如下:「今天是一個特別的晚上,因為這個地方對某對情侶有特殊意義,我相信他們是在這裏認識。」

Ming仔在飛機上向網友講述他與Debbie的相戀經過,原來Ming仔回港發展前已經認識Debbie,當初是雙方一同經歷失戀之痛,經過相處後便自自然然走在一起。(影片畫面)

之後,Ming仔從街角步出,走到Debbie眼前,令她非常驚喜:「點解你會喺度嘅?」Ming即溫柔地說:「跟我嚟。」再握着女友的手走到廣場正中央位置。Ming仔走到電子琴前,在親朋好友、途人見證下,唱出《Home》這首情歌,搞到Debbie熱淚盈眶:「Debbie,希望你鍾意呢個Surprise,其實我三日前已經飛咗過嚟,我專登揀咗呢個地方,因為我哋嘅關係係喺度開始。」

求婚前,Ming仔在旁「埋伏」,非常緊張。(影片畫面)
被蒙在鼓裡的Debbie因突然見到Ming仔出現非常驚訝。(影片畫面)

特意穿上8年前衣着的Ming仔續說:「無論以前、而家定以後,我都會咁愛你。多謝你8年前為咗我放棄晒加拿大所有嘢,孤身隻影、離鄉別井咁去咗香港,一個除咗我之外,冇人冇物嘅地方。好多謝你好包容我有時脾氣唔好,好多謝你喺我就算做錯事時,永遠都原諒我,亦都好多謝你喺我作出任性決定時,你都支持我每一個決定,集中做我想做嘅事。我而家有個問題想問你。」之後,Ming仔便走近Debbie並單膝跪下,舉起鑽戒問:「你可唔可以嫁畀我呀?」Debbie默默點頭,答應下嫁Ming仔,成為對方的未婚妻,而他們的親朋好友即上前祝福。Ming仔接受《香港01》訪問時仍然非常興奮,問整個求婚過程構思了幾耐,他的答案絕對會令聽者患「糖尿病」:「條橋我度咗8年喇!」又指自己與未婚妻仍未決定幾時正式拉埋天窗,初步計畫是明年初。

Ming仔在Debbie面前唱出Michael Buble名曲《Home》。(影片畫面)
Ming仔跟住規矩單膝跪下向Debbie求婚,當他在網上分享影片時,他留言寫道:「由呢一刻開始,我成為咗世上最幸福嘅男人。」引來大批網民「畀Like」兼祝福。(facebook)

Ming仔遠赴加國求婚過程逐格睇:

+23