【火速救兵】陸駿光演消防員挑戰高溫堅玩命:拍古裝都冇咁熱!

撰文:
最後更新日期:

陸駿光(Alan)今日(26日)參與香港電台劇集《火速救兵IV》拍攝,飾演消防區長的他着住重逾9公斤的全副裝備進入火場救災。雖然全程有真正的消防員監察拍攝進程,但陸駿光卻面臨「最擔心自身生命安危的一次」,因為戴上氧氣樽同頸巾連面罩的他亦要着住非常厚重的「黃金戰衣」,他接受《香港01》訪問時說:「咁大個仔都未試過咁熱,拍古裝就算打埋都冇咁熱!尋日有一刻係想暈、想停一停機,但係又覺得好瘀,所以頂硬上。」

陸駿光直言覺得當時身體無法散熱,心臟跳得又快又響:「過咗十分鐘後,我就好啲喇,因為熟習咗,唞順條氣,慢慢舒吸就好啲囉,然後就真心覺得消防員好犀利。(成身濕晒?)好似俾人倒水淋到濕晒咁,拍到尾就換走制服即刻入落膠袋,拎返屋企即洗。」

陸駿光指今次拍攝是「最擔心自身生命安危的一次」,因為着住消防員「全副武裝」開工仲熱過拍古裝戲。(陳栢宇攝)

十年前被王喜救出 今日變消防員救人

其實陸駿光在無綫劇集《烈火雄心3》(2008年製作、2009年播出)中演出,但不是與王喜、鄭嘉穎並肩作戰的消防員,而是被他們拯救的小混混。在第2集中,他便與黃宗澤被困於已成火場的卡啦OK裏面,王喜幾經辛苦才找到他們兩人:「嗰場勁呀!啲火喺幾個石油氣罐噴出嚟,直頭喺我哋頭頂飛過,我哋已經即刻趴低,但啲頭髮都係燒着咗,要即刻搵人拍熄,事後發現啲火連塊面都燒埋搞到啲毛冇晒。講真,我覺得我嗰場做得好好,幾有滿足感。」

陸駿光又笑謂當時不懂得害怕:「可能嗰時仲細,唔識驚,又一心想做得好啲,因為都算有戲做。其實真係冇諗過啲火咁勁,爆之前工作人員就話數一二三就跑,Bosco經驗豐富過我好多,佢就話幾大就數到一就要跑!之後王喜喺《今日VIP》裏面點名讚我呢場做得好,嗰次係第一次有前輩讚我,之後我都有親自多謝佢。」

陸駿光在休息時間即除低「黃金戰衣」,防火衣下的制服完全被汗水沾至濕透。(陳栢宇攝)

在《烈火雄心3》中與黃宗澤一齊被王喜救出,大火撲過來時,三人即時同趴下。(網上圖片)

+6
+5
+4


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。