馮盈盈做港姐主持淡定無亂噏：睇得出我有唔同係一種肯定

馮盈盈 (FYY)不時在《後生仔傾吓偈》語出驚人，前晚佢同好姐妹麥明詩一齊主持港姐問答環節，事前二人都表示擔心會講錯嘢，但節目出街後，唔少網民都激讚FYY的表現，更指佢對住Do姐（鄭裕玲）都可以咁淡定，比起陳凱琳兩年前為《萬千星輝賀台慶》擔任司儀時，口快快將「奮不顧身」講成「粉身碎骨」絕對係超班，有網民更認為FYY大可主力向司儀發展，因為她轉數快且夠貼地。

當年FYY參選時，因為被網民搵到佢昔日的金毛（加粉紅）舊照，故一直有「MK港姐」稱號。而自從佢主持《後生仔傾吓偈》後，因不時都大講甜嘢，網民有感佢係博出位，但與此同時，亦有網民覺得FYY唔造作，與過往的港姐有所不同而對佢另眼相看。

其實Do姐同FYY已非首次交手，今年FYY曾作客《Do姐有問題》，但佢喺節目中口無遮攔，搞到Do姐都頂唔順，大叫：「盈盈咪嘈！」估唔到數月後，二人於港姐舞台上交手，當11號李明芙被麥明詩問到︰「你覺得有邊個佳麗今晚贏咗會唔公平?」時，見到佳麗一味笑不知如何回答，Do姐即時幫口話︰「可以答冇。」麥明詩聽到之後即指Do姐偏心，又話自己當年參賽時都無此待遇，結果慘被Do姐一句「你都選到香港小姐啦！」KO，而在旁的FYY就馬上補一句打圓場︰「係呀，所以好收聲啦！如果唔係俾人話唔公平。」比起平日於《後生仔傾吓偈》收唔到掣的表現，FYY原來都識睇場合。

FYY接受電話訪問時以「受之有愧」形容網民的讚賞:「我覺得冇乜大錯、冇破壞個騷已經好好，中間有啲dead air，都係靠Do姐出手相救，所以如果讚我，更要讚Do姐功力深厚。」她說一眾佳麗曾作客《後生仔》，對於大家的互動也有一定的幫忙，她亦因此更了解佳麗，所以在設計問題時更易落手。「網民可能覺得昨晚的馮盈盈有所不同，為什麼呢？因為我有刻意去壓低把聲，唔好太尖，說話的語氣同語速都有所不同，因為想配合港姐的氣氛，我唔知呢種做法啱唔啱，但網民覺得OK，對我來說也是一種肯定，他們有留意到我所花的心思，好開心觀眾原來睇得咁仔細，努力叫做有回報、有價值，多謝大家。」不過問到網民推做Do姐接班人時，FYY就大叫唔好玩，並指自己拍馬都追唔上Do姐。「Do姐咁大方淡定、又壓到場，我永遠都學唔到，如果真係畀我揀，我更想成為女版星爺，想在搞笑方面更努力，雖然自己好似已經在搞笑藝人路線上。」