《殺手》江美儀演一樓一同鳳姐做埋朋友:佢哋好nice,好敬業樂業

撰文:
最後更新日期:

Elena喺新劇做一樓一鳳姐。

無綫新劇《殺手》日前已經正式開拍,在劇中飾演一名深水埗「一樓一」的江美儀 (Elena),鳳姐扮相真是入型入格,為求演出迫真,她事前還進行了實地考察,親自聯絡並到該區訪問一些性工作者,現在更與她們成為了朋友:「佢哋好Nice,好尊重自己嘅職業,唔會覺得慘,好敬業樂業。佢哋仲好細心,我之前約完佢哋就想直接踩上門㩒鐘,點知佢哋叫我唔好,話我一個女人又係公眾人物,咁樣走上嚟會好唔方便,又叫我戴返個口罩,會幫我諗埋。

佢有去實地考察。

那麼Elena又可有參考她們如何去電男人同嗲男人呢?Elena說:「完全同我想像中唔同,陀地係有性格啲嘅,主要係做熟客,唔使主動去冧啲男人搵生意,同企街好唔同。」而拍攝的場境也是依照真實環境一比一大小搭建出來的,Elena表示:「個廠景真係好細,要封住個頂又好多塵,搞到我鼻敏感、氣管敏感兼哮喘病發。我連啲擺位跟足晒,之前有影相做參考,例如門口會有張A4通告寫住「除套等如強姦」,有好多守則寫晒喺度。結果有好多人嚟參觀我哋個廠景,因為大家都未去過,得我去過,我變咗顧問。」

廠景係一比一大小搭建。

至於今次的個角有無難度,Elena坦言:「每個角色都有難度,今次我係演一個快樂嘅妓女,好硬淨但其實內心係個小女人要人保護,尤其是對住我嘅恩客祥仔 (黎耀祥),所以我內心好矛盾。我原本以為做鳳姐係好好粗獷,結果出晒事,好在有祥仔同我慢慢調節返,我依家仲適應緊。」

佢呢個角色內心充滿住矛盾。

劇中Elena同祥仔唔止係鳳姐同恩客的關係,仲成為了朋友,而現實世界中這種情況確是會發生的。Elena說:「佢哋會煲湯畀啲客飲,有啲會做咗朋友,約出嚟食飯同去旅行。」問到她可有為呢個角色僭建身材,又或是食肥些令自己豐滿些,身為豐胸品牌代言人的她即大賣口乖說:「我係一個盡責嘅代言人,全靠老闆娘送畀我個Bra,push up效果非常好,又唔使痴膠紙或者加其他嘢,又唔怕會走光,令我演得好自在。」

佢話自己係個盡責嘅代言人。

Elana又大讚日前跟她拍了一場對手戲飾演嫖客的小鮮肉黃耀煌,她說:「監製話要搵個小鮮肉,我又唔識有咩小鮮肉,咁之前喺《同盟》同過耀煌合作,於是就推薦搵佢演。佢好犀利,原本180幾磅,由我8月7號通知佢,佢用咗一個月唔夠嘅時間減咗20磅去演呢個角色,仲要拍之前2日唔飲水,令啲肌肉靚啲。佢事前完全唔知道係要除衫上陣,純粹係佢自己覺得演嫖客可能要除衫,於是就努力減肥。所以機會只會留畀有機會嘅人呢句說話係好啱㗎。

Elana大讚飾演嫖客嘅小鮮肉黃耀煌。

一齊睇多啲Elena嘅靚相啦。

+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。