【後生仔傾吓偈】麥明詩爆三大力捧小花:喺TVB大聲就係無敵

撰文:
最後更新日期:

麥明詩話「TVB大聲就係無敵㗎啦」,係真唔係呀?

《後生仔傾吓偈》愈做愈有,最新一集陸浩明就叫一眾KOL自選「你最想清除的女主持」,佢自己首選就係馮盈盈(FYY),原因係怕職業性失聰,之後更指FYY係「TVB三大喇叭之一」。不過問到另外兩大喇叭係邊個時,陸浩明都好有口德話唔講。不過,麥明詩就好快咁話:「馮盈盈、江嘉敏同劉佩玥嘛。」並以「三大力捧小花」形容三位,雖然FYY話唔敢當,更笑自己係三大巨頭之一,但麥明詩就繼續捧,仲話「 TVB大聲就係無敵㗎啦」,似乎有弦外之意。

馮盈盈因為聲浪太大而成為TVB三大喇叭之一。

同係港姐出身嘅FYY同劉佩玥,近年確有唔少工作機會。先講FYY,除《學是學非》同《後生仔傾吓偈》之外,去年首次拍劇《果欄中的江湖大嫂》獲一致好評,緊接又同郭晉安、馬國明合作《白色強人》,近日同王浩信、唐詩詠於新劇《解決師》交手,機會多的是。而FYY 8月時首次擔任《香港小姐競選》決賽司儀,雖然只係負責一部分,但表現備受肯定,相信接下來會有更多機會。

兩大喇叭之前合作《果欄中的江湖大嫂》時就已經被網民比較過。

至於劉佩玥,入行初期曾為《安樂蝸》、《激優一族》及《Y Angle》固定主持,2014年開始向戲劇發展 。《EU超時任務》、《城寨英雄》、《降魔的》等高收視劇集全部都有佢份,今次《香港小姐競選》決賽,劉佩玥亦被安排做星級評判團成員,足見公司真係有畀機會。至於另一喇叭——江嘉敏,雖然曾被公司短暫雪藏,但絲毫無影響其親生女地位。短短兩三年間,由《親親我好媽》的女配角爬升至《兄弟》的第一女主角,上位勁快,難怪會被麥明詩指為「力捧小花」。

估唔到劉佩玥原來都係喇叭之一。

+7
+6
+5


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。