【專訪】爆肌男張文傑加盟古天樂旗下 :古生會諗辦法去幫我

撰文:
最後更新日期:

近年古天樂在影視界的影響力愈來愈大,除了身兼演藝人協會會長外,更是多間電影製作公司、經理人公司的老闆,旗下藝人除有林峯、佘詩曼、姜皓文等人之外,近來亦吸納了一班「動作派」,當中包括大台劇集《特技人》的羅浩銘以及曾擔任動作指導的張文傑(German),動作指導的工作到底會做些什麼?張文傑說:「以前《東華》吳剛搽油、肥姐踩雞蛋嗰啲都係我爸爸諗出嚟」

無論係幕後定幕前,收入永遠是最大的難關,張文傑試過半年無工開,靠捱麵包過日子,問他另一半點睇,他說:「如果另一半對呢方面有concern就唔能夠發展,因為我一定要做呢樣嘢。」。(葉志明攝)

受著爸爸張孝慈、伯伯張存的影響,張文傑很小就已學習功夫、雜耍,從掌聲中得到滿足感,令他不曾感到所謂的辛苦,到後來開始為電影負責特技、舞台動作等工作,開始賺到少少錢,索性連書都唔讀。「以前爸爸同阿伯負責度《東華》表演,後來無咗《東華》就去新加坡訓練舞台特技演員,試過想用拔罐吸起一個人,因為之前未做過,我唯有做白老鼠,在背上左吸右吸都係唔得,最終表演時出了點法寶才順利過關。」
 

張文傑在不少電影擔任替身,受傷少不免,他說最難忘是為法國電影做替身,需要在ifc對開的天橋跳到行駛中的巴士上,只要有少許失誤都會變成大件事,不過,最後他也一take過完成戲份。

除了白老鼠外,張文傑亦試過在鹹蛋超人的周年巡演上扮演其中一角,雖然著上超人衫後視線范圍只得一條線、抖氣位亦只得一個小洞,但能夠知道超人的死光秘密,加上短短一個月已賺過萬,對當時的他來說可謂十分滿足,亦令他誤以為錢真係咁好搵。「我出生時電影市場好好,但到90年代入行,電影市道好低落,係好痛苦,半年無收入,食麵包、食公仔麵,唔係一次半次而係經常性,媽媽成日都鬧我,叫我搵嘢做或者開的士,聽完會唔開心,爸爸雖然係呢行,但亦都好現實,覺得搵唔錢就咪做。」

通過姜皓文的推薦而成為古天樂公司旗下藝人,張文傑大讚古生對員工十分關心。

張文傑做過替身又做過動作指導,到近年開始見樣拍戲,轉變甚大,當中的契機是什麼?「以前對自己好有信心,覺得自己好靚仔,但要剃光頭拍一場戲,個心會唔舒服。」張文傑並不介意做幕後英雄,而且甚為享受做到每一套動作,只是他覺得可以作不同的嘗試,又剛好有細細個已經識嘅「黑哥」姜皓文,令他順利成章成為古天樂旗下的一份子。「黑哥叫我時刻都要裝備自己,因為我係動作出身,所以一定要Keep住身手。」
 

張文傑與羅浩銘同為古天樂旗下的藝人。(葉志明攝)

對於老闆古生,張文傑說他雖然忙到無時停,但仍願意抽時間去了解各人的需要。「唔可以話一定畀到機會大家,但起碼佢會諗辦法去幫,係令人好感動,亦都好願意佢有事時幫返佢。」近年香港打得嘅男星確係唔多,不過張文傑能否在當中突圍而出仍係未知知數。「紅唔紅係際遇,我可以靠動作出人頭地、接近到甄子丹水平,唔係同佢差好遠。」他自信滿滿的說。
 

張文傑小時候就已經跟隨爸爸到電視台玩。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。