【又一女神離開】朱千雪諗住退出娛樂圈？ 　傳會轉行做律師

喺娛樂圈外貌出眾嘅藝人有好多，但靚得嚟有觀眾緣形象入屋就唔係咁容易啦。繼鍾嘉欣岑麗香婚後相繼離開TVB，呢日又傳出深得觀眾喜愛嘅朱千雪，有意放棄演藝生涯，轉行戴假髮做律師，仲話已經有著名律師樓向佢招手，網友聽到真係晴天霹靂呀﹗朱千雪接受《香港01》訪問時就話：「的確因為時間關係，《踩過界》之後未開劇……」

2012年參選港姐入行，獲網民捧為民選冠軍嘅朱千雪（Tracy），入行以來深得觀眾歡心，工作不斷嘅Tracy等咗四年終於等到擔正機會，於劇集《EU超時任務》中演第一女主角，同渠頭（王浩信飾）嘅一段情，更令不少網民心酸落淚。然而，朱千雪自《EU》後鮮有作品推出， 2015年中大企業傳播碩士畢業後，16年再攻讀香港城市大學法律博士課程（Juris Doctor），有意鋪路轉行做律師。

之前Tracy接受香港01訪問時話過：「律師是我好尊敬的職業，做到與否視乎這幾年的訓練，我想先專注眼前的學業。」翻查紀錄，2016年一連播出4套作品後，電視觀眾已甚少機會見到Tracy身影，2017年學期同學期之間客串《踩過界》飾演王浩信前女友Yanice後，維基百科寫住Tracy未播出嘅作品只剩一套《金宵大廈》，但我哋向劇組查證過Tracy並冇參與呢套劇集拍攝，要睇佢現身螢幕，就只剩得閒做下綜藝節目嘉賓啦。

Tracy接受《香港01》訪問時就話：「因為時間關係《踩過界》之後未開劇。暫時要看上課時間，要配合公司開劇的時間才能看有冇機會再有新作品。」到底Tracy係咪真係會退出娛樂圈轉行做律師？「我距離畢業還有一段時間，現在只想focus讀書同埋做現時公司幫我安排的工作，之後條路點行，到時再決定...…現在距離能qualify還有一條很長的路，但我會畀心機的。」相信都係等佢讀完3年法律博士課程後先再算啦。