【再創世紀】陳少邦回巢拍TVB劇 難忘演屍體險窒息 

撰文:
最後更新日期:

熱播劇集《再創世紀》日前就講到卓家兄弟因車禍雙雙過身,令觀眾嘩然!在劇中飾演的香港四大首富之一卓啟堂的兩位兒子Gordon和Melvin分別是演員陳少邦與楊鴻俊,兩位外形極度相似,更有觀眾問二人是否「孖仔」,引起不少討論。

「唔係孖仔,我係大哥,鴻俊喺劇入面應該細我2年。不過拍嗰陣都有服裝部嘅同事認錯我哋。」陳少邦笑言自己也覺得與楊鴻俊的確有幾分相似。他透露劇中有一幕令他很難忘:「當時周勵淇到殮房認屍,拍嘅時候,初初用塊布襟住我哋已經透唔到氣,佢揭開塊布我哋要繼續閉氣演屍體,所以等Niki做埋場戲,幾乎窒息。」

卓家兄弟因車禍雙雙過身。(電視截圖〉

點撃圖片逐格睇!

+5
+4
+3

但其實原來除了郭晉安,1999年藝員訓練班出身的陳少邦亦曾參與神劇《創世紀》,他笑言:「係呀,我同阿怡都有演。我好似仲演過兩個角色,但咁耐記憶好模糊,都唔記得演咩。」沒錯,陳少邦在《創世紀》中演過賓客和ICAC職員。雖然他外形不錯,但入行多年一直未能突圍而出。2012年,陳少邦決定離開TVB轉投香港電視打算闖出一片天,但奈可港視未獲發牌,他在娛樂圈發展又告吹,為了生活,陳少邦不得不轉做健身教練,他稱:「雖然同期的同學發展都唔錯,好似林峯,幾難先可以出到一個偶像!但我從來冇攞自己同佢哋比較,每個人嘅際遇都唔同,而且自己知自己事。」

+2

機緣巧合,陳少邦重回無綫以部頭約形式合作,他表示:「雖然都諗過放棄做演員,但諗嚟諗去始終自己都係想做戲,所以就拍《再創世紀》。(有無諗過同TVB簽返長約?)都有呀,但無人搵我傾。(部頭約人工會唔會高啲?)人工差唔多,但淨係做TVB梗係唔夠生活,我都有返內地登台、拍網大同做司儀,都夠養妻活兒。」

陳少邦透露正在拍攝新劇《解決師》,而閒時他又會學功夫、跳舞和唱歌增值自己。他亦計劃出歌,他稱:「因為江暉應承過寫首歌俾我,都好多年,希望自己嚟緊都會有首自己嘅歌。(嚟緊都會繼續自己嘅演藝事業?)會呀,希望趕得上尾班車。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。