【早霸王】女仔收兵男仔都有錯 森美：唔值得可憐
撰文：鄺鈺瑩
出版：更新：
女聽眾同女同事一齊行山、游水、單獨食飯，再睇埋日落，結果都係未達標。
自從經歷過「阿希事件」後，森美學精咗好多，就好似今集《早霸王》「你知道唔知道有人掛住你」環節，當佢聽到女聽眾Ada想向同事表白後，即時問對方係咪女仔。證實完之後，Ada開始分享佢同女同事嘅一點一滴，二人除咗會一齊行山、游水、食飯之外，每次gathering之後，家住柴灣嘅Ada都唔怕路途遙遠，同同事一齊搭巴士返屯門。不過講到最sweet嘅，Ada就話月初去東歐旅行時，特意打viedo call畀女同事一齊睇日落。森美聽完之後，都認為如果對方唔抗拒的話，呢單嘢應該都順利，不過佢亦都補充︰「同同性食飯好正常。」而小儀亦都認為︰「女仔best friend好容易。」
「做兵係唔值得可憐㗎，因為你自己選擇。」
Ada表示對方有同過男仔拍拖，但就未有探聽過佢對同性戀的意向，Ada雖然認為唔會嚇怕對方，但把聲聽落都有少少怯，「我都做得幾明顯㗎啦，同佢搭巴士佢一開始都驚訝，但都有keep住笑。」假如表白失敗，會唔會連朋友都冇得做呢？森美即時愛情專家上身：「冇friend做我覺得唔慘，做唔到情人，你做乜要眷戀喺錯誤的關係之上？唔係件事有錯，係對自己冇益。有啲男仔做兵，返到屋企暗自憐，呢個係自己攞嚟，做兵係唔值得可憐㗎，因為你自己選擇，佢收兵你唔做咪得囉。」
雖然電話接通，但由於女同事話enjoy單身生活，所以森美將呢次表白hold住。
分析完之後，電話接通同事Yan，例牌都要問聲：「估唔估到邊個打上嚟？」「有冇感覺到近排有人追你 ？」Yan就話身邊好多朋友都對佢好，所以估唔到邊個打電話要表白，再細問之下，Yan就話︰「Enjoy單身生活，同埋未ready、未遇到啱嘅人。」既然都已經講到咁，森美決定將呢個愛的表白行動叫停。