梁証嘉突然復出演《開心速遞》 事業低潮期曾到主題樂園打工

撰文:
最後更新日期:

處境喜劇《愛.回家之開心速遞》一向人物多支線多,總有一個角色得你歡心,而劇集最近又有靚仔新角色加入!在上星期三(19/9)播出的第411集中,由梁証嘉飾演「朱天梯」終於正式出場,為了令細佬「朱凌凌」吳偉豪重新選修法律系並繼承家族事業,不惜夾埋老竇「朱展」陳嘉輝扮病設局,吳偉豪趕到醫院後,梁証嘉即爆Seed怒剷對方:「爹哋就係俾你激親,搞到心肌梗塞,𠵱家要通波仔呀!」不過,「金城安」周嘉洛竟然捱義氣代替吳偉豪入律師樓,令陳嘉輝和梁証嘉大失預算……

久違TVB劇的梁証嘉突然在《愛.回家之開心速遞》中亮相,其怒剷戲中弟弟吳偉豪的場面,亦觀眾非常驚喜。(電視畫面)

曾拍《巾幗》《天與地》 由明日之星變閒角

或者你會覺得梁証嘉這位演員熟口熟面,之前好像有一段長時間常常在TVB中看到他的身影,沒錯,他曾經在校園劇《尖子攻略》(2008)中與羅仲謙、梁烈唯齊齊做運動健將,又在《巾幗梟雄》(2009)中飾演敖嘉年、吳卓羲細佬「蔣必武」,更在《天與地》(2011)中與楊潮凱、羅鈞滿在天山上分食被他殺死的「家明」張景淳。雖然愈來愈多機會的梁証嘉在《天與地》中的演出頗為亮眼,算是有「明日之星」的氣勢,但之後卻是無以為繼,僅在劇集中飾演一些欠發揮機會的閒角,年幾兩年前更開始在TVB絕迹,所以他在《愛‧回家之開心速遞》中復出,都令部分觀眾感到出奇。

梁証嘉在《天與地》中與楊潮凱、羅鈞滿一齊食「家明」張景淳,而「家明」更是梁証嘉所殺。(網上圖片)

感激《開心速遞》監製:多謝佢畀機會我!

問之後會否再出場,梁証嘉接受《香港01》訪問時便指自己還未知道後續發展:「首先我要多謝監製林建祥畀機會我加入劇組,我覺得細佬(吳偉豪)同嘉洛都好好,雖然我都算係師兄,但佢哋兩個一路都有帶住我做戲,幫我搵Sit-com(處境喜劇)個節奏,等我知道點樣可以再做好啲,因為我一路以嚟都冇拍過Sit-com。」

談到梁証嘉似乎絕迹香港多時,他坦言最近一年的確是在內地發展演藝事業,問內地拍劇、拍戲是否比起香港好搵?他說:「喺國內拍嘢係比起公司賺得多,但我唔係因為片酬多先去國內做嘢,係因為表演空間、機會都多啲,多啲機會、多啲磨練永遠係開心過多啲片酬,演技唔會因為多啲錢而改進。(多幾多?)具體數字唔講啦!(即係有同樣嘅工作機會,你首選都係TVB?)冇錯,始終係兩個平台嚟,我喺國內拍咗幾多嘢,香港嘅觀眾都未必知我拍咗咩,我喺香港出世香港大,係我自己地方,香港永遠都係首選。不過,國內嘅團隊係好認真、好肯付出,有啲導演、監製會自掏腰包拍嘢,純粹係想件事再好多啲。」

梁証嘉除了感謝周嘉洛、吳偉豪幫手帶他入戲,亦感激監製林建祥讓他加入劇組。(電視畫面)

直認性格不進取 拒絕減肥遭減戲份

講到梁証嘉之前經常為重頭劇演出,在《巾幗梟雄》、《天與地》中頗有發揮,看來似是TVB力捧的新血,但之後卻是後繼無力,他在訪問中講出箇中因由:「好似拍《巾幗》時,大家都好惜我,卓羲、嘉年、雯女(鄧萃雯)同華哥(岳華)都好照顧我,凡事都提點我,令我冇乜壓力,加上我自己本身都唔係好進取嘅人,所以由公司好肯畀好角色我做,到公司唔再畀,我確實係有啲灰。」

問是否發生過特別事情,令其穩步上揚的事業變得急轉直下,梁証嘉坦言一切與其心態有關:「以前我以為機會係自動會有,拍完一套劇時,等下就會有第二套可以做,而我喺中間嘅時間從來冇好好裝備自己,當正放假咁,好放肆咁食嘢,搞到個人好肥,個人脹咗。當時珍姐、樂小姐好惜我,好心搵我傾偈勸我減肥、Keep Fit,因為變肥咗上鏡唔好睇,但係我冇理到,以為呢個問題唔嚴重。」直至他接得愈來愈少戲,角色愈來愈次要,他才意識到這種不思進取的想法是問題根源:「其實我待人處事都有好多嘅不足,我一讀完書就入行(2006年讀第20期TVB藝訓班),唔多識講嘢,有記者問嘢又唔識答,就算有諗法都唔知點表達。」

梁証嘉曾在重頭劇《巾幗梟雄》中演出,飾演敖嘉年、吳卓羲的細佬,甚有發揮。(網上圖片)

(網上圖片)

不知要過怎樣的人生 母親代交藝訓班表格

年多前,梁証嘉由經理人合約轉到基本藝員合約,「灰爆」的他把心一橫任性一番,先後到迪士尼樂園和海洋公園工作,一圓小時候的夢想:「因為由細到大好鍾意迪士尼嘅動畫,所以我去咗迪士尼度做演員,做咗唔係好耐,我又因為好鍾意動物,膽粗粗去見(應徵)海洋公園嘅動物訓練員,當時我同主管講我的確係咩都唔識,但係我會好畀心機去學,因為我唔想再好似之前做演員咁成日驚冇戲拍,最後佢哋真係請咗我,我當時真係好開心,因為呢件事係我細細個就想追求嘅嘢,另一樣嘢就係做警察,但我未考警察之前,我媽咪就已經偷偷哋幫我遞表去藝訓班。」

雖然,照顧動物是梁証嘉的兒時夢想,但小男孩總會長大,他漸漸發現自己眼前的工作,其實並非他最愛的工作,演戲才是人生最重要的事,有如那些年的胡楓,他原本有口吃,但到了幕前演戲,有如另一人上身:「原來真係好鍾意做演員,做演員令我更加有自信,有種感覺就係好似修哥(胡楓)咁,一做戲就好似另一個人咁,好似有另一個人生。」

梁証嘉非常鍾意迪士尼卡通人物,甚至曾走到樂園中擔任演員。(Instagram)

梁証嘉的確非常喜歡卡通人物以及他們的世界,有圖為證:

+4
+3
+2

經黃柏文認識監製廖志強

或者上天聽到梁証嘉的心聲,他經前輩黃柏文介紹下獲得監製廖志強邀請到內地拍劇:「強哥好肯畀機會我,佢絕對係一個好爸爸,當時我幫修哥(李修賢)公司拍嘢,佢都成日提住我要努力。」跌過的他懂得珍惜,知道不可以再錯過眼前的機會,所以他比起其他人更為努力,連續接拍7、8套未計客串演出的電影、劇集:「我諗返起嘉年當年同我講,公司好難得咁畀機會我,我要好好珍惜,我當時唔明,但𠵱家明白晒,團火就慢慢喺工作當中撻返着,我𠵱家敢講我係好愛我自己嘅工作。」

梁証嘉在過去一年多時間中,出演過多套內地製作劇集和電影,包括主演過圖中的網絡大電影《奪命追兇》。(Instagram)

梁証嘉最近亦有參與港產片演出,與《巾幗梟雄》中的「二哥」吳卓羲再度合作,不過今次梁証嘉是飾演劉心悠的細佬。(Instagram)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。