盤點年尾最期待的無綫劇 《十二傳說》《金宵大廈》周末劇成大熱

撰文:鄺鈺瑩
出版:更新:
《鐵探》有影后惠英紅,又有姜皓文,講述一群身心受創的警察,面對高智慧的悍匪、警隊高層權鬥的故事,並呈現人性的軟弱與堅強。早前預告公開之後,唔少劇迷都表示十分期待,不過相信今年未必會播住。

無綫上半年所播出嘅《果欄中的江湖大嫂》、《逆緣》、《BB來了》同《宮心計2深宮計》都叫好又叫座,嚟緊將會到一年一度的台慶劇出動:《是咁的,法官閣下》、《兄弟》及《跳躍生命線》。《是咁的》以向來都有一定捧場客的律政劇為題,由黃智賢、關禮傑、王君馨同麥明詩擔正,卡士雖然好似有少少削,但劇中所發生的案件都係根據真實個案改編,加上該劇監制陳耀全過往的《棟篤神探》、《溏心風暴》、《天與地》、《全職沒女》均屬佳作,難怪《是咁的》會成為台慶劇之一。

胡鴻鈞因《降魔的》而升呢,首次擔正做男主角,《救妻同學會》預計11月播出。

之不過,講到最期待的劇集,唔少劇迷都睇好《十二傳說》、《金宵大廈》同埋《救妻同學會》。《十二傳說》以香港人熟悉的新娘潭、七姊妹及狐仙等傳說為故事為藍本,每個故事都會涉及到犯案、殺人或綁架等情節,並由飾演民族學教授的林夏薇、警察張頴康及記者蕭正楠同劉佩玥去拆解懸案,劇集原先安排在八月時首播,但後來要讓路《延禧攻略》,或將明年才有得出街。

林夏薇為調理身體為生B而離開無綫,《十二傳說》成了她的「遺作」。(資料圖片)

至於《金宵大廈》會成為期待之一,相信絕對同編審羅佩清有關,事關去年好評如潮的《降魔的》出至她的手筆,同《十二傳說》一樣,《金宵大廈》安排在星期日播出,暫定十集,以前世今生為背景,並由李施嬅、陳山聰擔正。而同樣都係星期日播出的《救妻同學會》,由胡鴻鈞擔正,劇中他為救老婆而變成通緝犯。同劇仲有劉佩玥、蔚雨芯、黃美棋等人,明sell青春。