林欣彤為年尾個唱狂減10磅 扮型拍攝海報最終得個亂
撰文：鄺鈺瑩
出版：更新：
終於可以舉行個人音樂會，林欣彤拍攝海報心情大靚。
林欣彤(Mag）今年先後推出《哪裡只得我共你》、《忍》和《重光紀念日》都有唔錯嘅反應，而之前佢話年尾將會行嘅音樂會亦已落實以What if為主題，「成日聽見唔同嘅人問我，如果林欣彤唔係咁咁咁，可能發展得更加好。但其實我好少咁諗，因為我一直深信，所有曾經作出嘅決定同發生咗嘅事，都必然有佢嘅意義同成就。每一個選擇都會有取有捨，每一個經歷都會有得有失，一切都係睇自己點睇所經歷同選擇嘅一切。我感激我經歷嘅一切，因為咁先有依家嘅我。」
由於要有飄逸感覺，所以係咁食風。
話晒今次都係入行8年首個售票音樂會，Mag早在半年前已開始積極備戰，除了注意飲食少吃煎炸食物，更積極做運動，包括瑜珈、跑步及游水，成功減掉十磅之後，Mag日前以22吋纖腰拍攝演唱會海報，「熟悉我嘅朋友同鍾意我嘅人，都唔難發現我係粉紅色控，無論袋、化妝袋、襪、屋企啲傢俬啦，好多好多都係粉紅色。呢個造型啲相出咗嚟之後，好多朋友都讚話好『林欣彤』。」
效果都唔錯。
Mag又笑謂團隊為了表達出其對音樂的熱情，刻意為其打造「Wild亂髮Look」，雖然出來的照片「型格十足」，但製作過程卻是笑料百出：「因為要好勁嘅風吹過嚟先營造到嗰種Wild嘅效果，所以我嗰日食風食咗足足八個鐘，唔單止影到頭痛。又因為啲風力好難控制，好多相都淨係見到一堆亂髮，又或者啲五官走晒樣咁，啲工作人員已經keep起好多核突相話要用嚟威脅我，好搞笑。」
+1