【有片】周勵淇帶隊遊電台 踩入直播室問森美點解唔約佢訪問
撰文：洪曉璇
出版：更新：
相隔多年再到電台，Niki話人事物都無咩變，佢自己就好似大細路一樣周圍睇周圍摸。（影片截圖）
做演員唔係話拍完套戲就完成工作，後續仲要配音補拍，同埋一大堆宣傳工作。日前，周勵淇（Niki）接受電台節目《一圈圈》同《星光背後》訪問，為劇集《再創世紀》宣傳。近年喺國內時間比較多嘅Niki原來已經有四年冇上電台，呢日佢仲特登拍咗條「電台一日遊」嘅片。
踩入直播室見到森美小儀開緊咪，Niki勁興奮同老朋友揮手。（影片截圖）
片段一開始，Niki話作為一個歌手最常去嘅地方就係電台，不過其實冇歌派都可以去嘅。呢個時間原來撞正森美小儀就嚟做完節目，Niki即刻衝入直播室隔住玻璃同佢哋say hello，做完節目，森美好熱情咁同Niki攬攬，Niki即刻打蛇隨棍上：「你唔係同我做訪問咩？雖然我無歌派。」森美就話：「上嚟要講戀愛架喎﹗」Niki笑言：「戀愛囉，我最鍾意戀愛。」除咗喺直播室內外遊走，Niki亦都帶咗大家去歌手做訪問嘅地方、仲同商台女員工玩到攬頭攬頸。
咁耐無見，趁廣告時間森美都走出直播室，同Niki攬攬先。（影片截圖）
冇去電台四年，Niki話今次勾起佢好多回憶，「諗番起以前做歌手時啲歌派台嘅心情，訪問嘅畫面一次過出晒嚟。以前上電台就係工作，好機械式；今次就唔同，雖然今次都係做宣傳，但因為太耐冇去，心情係特別期待同埋唔覺得似係做嘢，好似去一個懷舊嘅地方去探朋友，講吓自己近況。有種好溫暖、好似返到自己屋企咁嘅感覺，人、環境都完全冇變，見番好多朋友、撞番好多DJ，好有歸屬感，好開心。」
Niki都笑言自己似去探朋友多過做訪問。（影片截圖）