【嫁到這世界邊端2】患脊柱側彎受情傷　港女羅馬散心遇波蘭真愛

英國尤金妮亞公主（Princess Eugenie）早前在婚禮上刻意露出她背部的疤痕，望鼓勵和她一樣曾受脊柱側彎困擾的年青人。TVB話題性十足的真人騷《嫁到這世界邊端2》，最後一位登場的波蘭人妻嘉瑩亦同樣患有脊柱側彎，她更在節目中提到，曾因病被多年暗戀的男仔嫌棄！

曾任空姐的嘉瑩在十三歲時診斷患有嚴重的脊柱側彎，雖她曾做過一次大型的手術矯正，但將來會否復發，甚至造成行動不便，都是未知之數。她更坦言有不少男仔都曾介意她的病，她稱：「我試過一次，暗戀一個好多年嘅男仔，佢竟然約我出街。當時好開心，有一次佢就約我去游水。但我媽咪同我講，佢話如果你想認真嘅，想同佢一齊就唔好去。我就話唔怕如果接受到就接受，早啲知好過遲啲知，之後照去咗，就冇咗下文。」

在一次失戀之後，嘉瑩與閨蜜去羅馬旅遊期間，在青年旅館邂逅現時的波蘭老公Peter。三個月後，Peter就來港時竟然立即向嘉瑩求婚。當時嘉瑩向Peter坦白病情：「識咗我老公之後，我一開始就同佢講，我做個手術可能隨時會行到路同做唔到嘢。佢就話又唔係去市場買豬肉揀邊舊靚，佢完全接受我，佢好無私好偉大。」

嘉瑩接受《香港01》訪問時，就透露自己曾經歷過比節目中提到更慘痛的失戀，她講到：「最難忘係有一個男仔，係上網識。第一次同佢見面嘅時候，都冇講到自己身世，冇講到咁深入，佢唔知我背脊有事。之後，佢就瘋狂追求，我哋都好快一齊咗，佢都知道我背脊有事，但唔知係咪呢個原因，當時大家感情都好好，講到去結婚，又睇樓開始做準備。但突然就因為一件小事同我分手，呢件事對我打擊都好大。其實，最終分手嘅原因都唔清楚，佢冇講到。」

對於這個病，樂觀的嘉瑩就坦言已經是自己身體的一部分，她更稱：「唔知係咪一種心結，我一直都唔想俾一啲先天性嘅嘢去阻礙到自己，唔想因為我背脊係咁樣，而註定我做唔到空姐，我好在意呢啲嘢。我好想靠我嘅努力而去得到一啲嘢，而唔係我未努力已經唔得。我依家已經好接受呢樣嘢，呢個病已經成為咗我一部分。」