【廣告女皇】着泳裝穿梭鬧市超尷尬　LilyMan累全組人變意識不良

ViuTV全新節目《Good Night Show廣告女皇》每集都會有唔同嘅物品交到一眾參賽者手上，再在詹朗林、陳子豐、陳俞希和陳炳銓帶領下，令物品變得有型有格受大眾歡迎。上一集一眾參賽者要在兩小時內，以有限資源為泳衣品牌拍攝廣告並發佈於社交媒體上。照片曝光後，結果負評連連，有網民更指要炒咗形象設計同攝影師。

之不過，其實所謂的形象設計同攝影師原來都係一眾參賽者，由於拍攝當日大會只係比兩個鐘佢哋，所以一班女仔都幾心急，而Lily Man(文芊澄)更因而成為眾矢之的，除搞到組員Vky黑面之外，導師陳炳銓亦都甚為有火，手忙腳亂之下，結果唔好話執相，連揀相都唔夠時間，評判之一嘅倪晨曦睇相後，都忍唔住指「你哋caption話自信源於你的選擇，但我完全feel唔到自信，好似各自做自己嘢咁。」而作品曾刊登於美國著名的成人雜誌《Playboy》的攝影師Ruby更直指陳炳銓一組的某幾張照片「意識不良」，大盤大盤冷水，幾位參賽者亦承認「揀相上係有錯誤 」。

而獲評一致讚好、得到第一名的詹朗林（JJ）組，雖然作品係幾有美感，之不過，參賽者Candy事後都好老實咁話：「由泳衣店出嚟嗰陣覺得petpet好赤裸，仲要喺灣仔，好想搵紙袋遮頭。」小神經表示自己第一次著比堅尼，以為會去到沙灘拍攝，結果原來在鬧市進行……拍攝外景時，小神經突然向工作人員表示「可唔可以俾返衫褸我，嗰個人個電話係咁（低炒），好尷尬。」一眾參賽者都唔係專業模特兒，要佢哋着住泳衣「遊街」影相，仲要俾人眼望望，勇氣同誠意少啲都真係唔得掂。sell完泳衣之後，新一集佢哋要負責sell安全套，節目更安排咗男觀眾到場，又係一埸尷尬之戰。