【跳躍生命線】被何廣沛基情滿滿撩下巴　羅天宇：差啲想打你啊！

電視劇《跳躍生命線》昨日（30日）舉行祝捷晚宴，近日在劇中破鏡重圓的兩兄弟何廣沛和羅天宇，感情突然突飛猛進，基情滿滿，令不少網民大呼：so sweet！廣沛直認他們簡直就是熱戀中的情侶：「好似嗰啲啱啱熱戀，但又唔可以話畀人知仲係地下情，你要傳個短訊話我知『今晚先見啦』，喂，你平時溝女係咪咁㗎？」天宇不解：「吓，你覺得係溝女咩？」廣沛大驚：「你平時係溝仔嘅？」天宇解釋其實自己私下和弟弟胡㻗相處也是充滿著「愛」：「我平時同細佬都係咁嘅，都係笑瞇瞇咁喺度message嘅。」（你同細佬都會潦下巴？）天宇指住廣沛：「佢潦我嘅！好純熟喎！」廣沛反問：「但你又受喎你無縮喎，你好欣然接受喎！」天宇大呼：「我差啲想打你啊！」

戲中其實兩人各自與劉佩玥和陳瀅有感情線，是否已經被他們兩兄弟的風頭蓋過？廣沛指其實自己與李成昌的父子情、與馬德鐘的師徒關係、與郭子豪張彥博的兄弟情以及與天宇的親兄弟情，每條線包括都非常濃郁，但廣沛竟然漏了說與劉佩玥之間的情侶感情線，他笑說：「係喎！我太大愛啦！我嘅愛想送晒畀大家，所以條條線都好濃郁，咁阿Moon呢啲就等吓先，排吓隊先啦！」

何廣沛日前已經與張彥博和郭子豪出海為劇集收視衝破30點「找數」，更提議天宇如果收視破35點就穿泳裝：「至少要露兩點㗎！除非你搵到件全身㗎啦！」天宇一臉不知所措，被廣沛半呃半氹表示：「都可以嘅，可以試吓嘅。」廣沛馬上乘勝追擊：「係咪promise咗啦？」天宇成功上釣：「好，I promise。」廣沛鬼馬露出奸笑：「咁就呃咗一個啦！」