【早霸王】男聽眾成日講I love you 暗戀對象唔應機但如常約會
撰文：鄺鈺瑩
出版：更新：
男主角Steven暗戀Elaine十幾年，但竟然唔知對方有拍拖！森美比Steven激死。
又係《早霸王》嘅「你知道唔知道有人掛住你」環節，今次男主角Steven話自己十幾年前讀酒店管理課程時，鍾意咗其中一個女仔。「成日約佢睇戲、食飯，最近一次去跑步比賽，影咗好多sweet相，即係擺下心心甫士咁。」Steven更指跑步比賽係女方主動邀約。
森美話有啲人成日將「I love you」掛嘴邊，咁樣好似令人有誤會。
照咁睇，都好似幾有機會表白成功，之不過，當森美問Steven女方有無做過任何事令佢覺得有機，Steven就話自己成日都會喺Whatsapp同女方講「I love you」但對方就從未有回應過，而佢自己亦都無追問。「但之後約佢又會出嚟。」聽完Steven嘅故事，森美雖然認為表白成功率都幾高，但「如果無答I love you又怪。」為咗解開呢個疑問，於是就打電話比女主角Elaine，並巡例問「有無拍拖？」Elaine話同男友拍拖三年，而且感情仲唔錯！森美於是同Elaine解釋點解會出現呢通電話，又問佢覺唔覺身邊有追求者，Elaine表示：「同男友以外嘅男性朋友單獨食飯實有，普通朋友一定有架啦，但又唔覺有人追。」
森美叫Steven快啲搵過新對方。
好明顯係襄王有夢，神女無心，森美當然唔會比Steven表白啦，不過最好笑係當Steven聽到Elaine原來有男友時，仲反問森美：「係咩?唔知佢拍拖喎。」森美問佢點解唔一早問，估唔到Steven再一次放笑彈:「無問喎。」並不停傻笑，激到森美都忍唔住講句：「你仲笑得出！」