余德丞暫時未有拍劇計劃 下年再夥蔡思貝拍旅遊節目

撰文:
最後更新日期:

余德丞(Dickson)連同朱晨麗(Rebecca)、馮盈盈(Crystal)以及陸浩明(6號)出席活動,Dickson西裝骨骨亮相現場,還大開金口獻唱《單車》,氹得粉絲尖叫聲不斷,看來他身體都恢復得不錯:「而家好咗好多,但係頭先唱歌都覺得有小小唔夠力,可能要再做多啲運動先得,當然會適可宜止嘅。」

Dickson西裝骨骨出席活動,透露近排身體好了好多。(梁碧玲攝)

講到唱歌,Dickson自爆由大學開始就鍾意唱K,而且非常支持本地樂壇:「我都會睇好多演唱會,聽好多歌同埋好多碟。」既然Dickson咁有興趣,不如考慮下進軍歌壇?他表示:「當然熱成我係有嘅,但係差好多嘢啦,要學下啲唱歌技巧呀,啲台風呀等等,我唔排除呢個機會,咁但係都要多啲練習先囉。」

雖然現在健康狀況良好,不過Dickson暫時未有計劃拍劇:「當然,都要睇下個劇本同角色啱唔啱,即係都聽過有啲角色可能會郁動大啲嘅,自己都唔係太放心,咁所以我未必會做嗰啲角色住,都係以綜藝節目為主。」Dickson做過體育、訪談、旅遊等多個節目,早前他同蔡思貝(Sisley)主持的《緬甸奇幻旅程》大受歡迎,Dickson透露明年可能還會同對方一齊做旅遊節目:「應該係亞洲地方嚟嘅,即係希望帶啲神秘啲嘅國家畀大家睇,希望大家開心。」

Dickson透露下年將連同Sisley再做旅遊節目,他笑言對方頭髮現在頭髮太短,沒有女神的感覺,想她頭髮長返啲先一齊拍節目。(梁碧玲攝)

Dickson現在的工作暫時以綜藝節目為主,因為身體為完全好返,不可以長時間勞累,他坦言如果一兩日還可以,如果連住三、四日或者成個禮拜都辛苦,所以初期都盡量避免。(梁碧玲攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。