【早霸王】女聽眾想主動向暖男表白：因為要霸住佢，唔可以錯過
撰文：鄺鈺瑩
出版：更新：
今集「你知道唔知道有人掛住你」女主角雖然唔係好識講嘢，但佢都鼓起勇氣講出key word，連森美都讚好。
表白都可以話係一門幾高深嘅學問，有聽開《早霸王》 嘅聽眾相信就會更加認同。最新一集嘅「你知道唔知道有人掛住你」，女主角阿琪就話準備表白，對方係一大班朋友出嚟玩時認識。「感覺佢係暖男，好貼心，凍嗰陣會買褸比我著。」聽到呢個舉動，森美同小儀都不禁「嘩」咗好多聲，仲笑言「如果佢聽到你話想去旅行，應該成個地球都買比你」阿琪解釋係因為有次去睇戲時覺得凍，於是男方提議去買外套，雖然佢有話比錢，但男方就一口拒絕，如此細心，唔怪之有暖男感覺啦，連森美都話「呢啲係男朋友先先會做嘅嘢。」
要得到一句「我都鍾意你」真係唔易架。
阿琪仲話試過行花市時，因為人太多，對方一手捉實佢。「同埋佢有時起身會Whatsapp我，問我做緊咩，但由始至終佢都無表白過。」既然男方無任何提示，點解阿琪會咁大膽呢？「因為要霸住佢，唔可以錯過。」呢個理由又真係非常之充足。
聽到阿琪同雞仔表白，森美都好興奮。
電話接通一名叫雞仔嘅男生，雖然佢聽到森美有話女仔鍾意佢時，好似有少少意外，但都補充了一句「係對一個女仔有意思，不過唔知係未你哋講嗰個，佢成日都好大意，好多時都唔係好識照顧自己。佢叫咩名？阿琪。」雙方電話都接通後，阿琪似乎因為太緊張，所以唔係好識講嘢。「嗯……我唔識講……」聽到森美好肉緊咁話「把握」之後，阿琪終於講出「我鍾意你」男方傻笑一輪之後，就以「我都鍾意你」作為回應，身為紅娘嘅森美雖然大叫毛管戙，但都忍唔住大讚成件事非常夢幻，更指要得到「我都鍾意你」呢個答案其實好難，尤其係今次女主角不善辭令。「平時男仔我多數都會教路，但女仔真係一句就會令男仔融晒。」