【義不容情】李泳豪連場嚎哭勁淒涼:我而家都喊得返咁勁

撰文:陳栢宇
出版:更新:

由黃日華、溫兆倫主演,韋家輝監製的無綫神劇《義不容情》正在翡翠台深宵時段播出,雖然劇集首播已經是30年前的事,但情節、人物之間營造的張力卻沒有因為時代變遷而減退,特別是頭3集藍潔瑛含冤問吊的部分,不但教睇過劇集的觀眾再一次感受當中的心酸,亦令首次觀看的新一代體驗到何謂峰迴路轉,明白到一套好劇應當如此。

《義不容情》首3集之所以能夠做到真正的劇力萬鈞,劇本寫得好固然重要,但都要多得多位演員演繹得淋漓盡致,才能夠令觀眾緊張到不願離座,除了藍潔瑛、黃日華、鄭君綿等勁人外,當年8歲的李泳豪亦功不可沒。戲中,飾演藍潔瑛兒子的李泳豪在母親被拘捕一幕中,喊得聲嘶力竭甚有感染力,之後他幾場戲都淚眼汪汪,稍為有同情心都會覺得心酸。

李泳豪一邊喊一邊睇住飾演其母的藍潔瑛被警察帶走的畫面,令觀眾非常心酸。(電視畫面)
+1

老實說,一個8歲小朋友能夠隔住熒幕觸動人心,殊不容易,最近亦只有《宮心計2深宮計》飾演童年元玥的黃雪兒和童年殷瑈的陳偲穎,及得上李泳豪的一半,因為她們都有「演」的痕跡。相信好多觀眾都有疑問,李泳豪當年喊得咁真,到底他是演戲神童,還是有「外力」推他一把?有傳其父李家鼎在李泳豪準備拍攝前會摑他幾巴,讓兒子喊定先,聽落雖然無稽,但卻好似好合理,因為李家鼎出名嚴格,對自己兒子的演出有一定要求。

今年38歲的李泳豪接受《香港01》訪問時:「當年真係好多傳言,又話老竇打我,又話阿媽(施明)打我,但係其實我性格,由細到大都係你打我我就唔喊,至於點樣喊得出,係因為我好錫我阿媽,我阿媽就喺片場裏面教我做戲,我亦都好黏住我阿媽,佢就叫我代入瑛姐(藍潔瑛)係佢,慢慢同我講,如果我冇咗媽媽會點,一諗到媽媽會死,我就喊得好勁。」原來是其母施明出「超必」。講到現時他接的角色發揮空間不像《義》劇,他說:「而家成個環境都唔同,冇得咁樣比較嘅!(喊唔喊得返咁勁?)咁一定喊得返嘅,但而家都唔興呢隻,咁樣喊觀眾會覺得你誇。」

原來李泳豪之所以喊得咁勁,並非傳聞中的被父親李家鼎兜巴星。(資料圖片)

提到李泳豪與不久前離世的藍潔瑛在《義不容情》中是母子關係,他坦言該兩個月的拍攝,是一段美好回憶,藍潔瑛確是非常疼錫他:「佢好用心咁照顧我,有時佢會同我講,『阿仔,呢個位應該要咁做』,放飯時照顧我亦都不在話下,當然啦,華哥黃日華、演我養母嘅蘇杏璇,同埋劇組、監製都好錫我呢個小朋友。其實我一直都好想多謝監製韋家輝先生,我同佢細佬韋家雄都好好朋友,我成日都同韋家雄講,如果佢阿哥當年冇揀我,冇人會知道李泳豪會做到咁嘅戲,一齣咁經典嘅神劇,之後佢都有搵我拍亞視嘅《還看今朝》,又係人物角色設計得好好,佢真係一個好了解我嘅監製。」

至於拍攝《義不容情》時最深刻的記憶,李泳豪便指自己仍然好記得當時是在清水灣電視城3廠拍攝:「我唔敢出街拜年,到偷年糕食,以至阿媽俾人審嘅戲,都係嗰度拍。之後我就去咗澳門拍,早兩年拍《巨輪2》,我仲特登去返當年拍攝嘅位置,影咗張相留念。」

李泳豪坦言與藍潔瑛相處的兩個月時間是一段美好的回憶。(電視畫面)
發表評論...