【專訪】王祖藍一樣會偷食？ 「我乜都有點解仲係唔滿足」
當男人講男人遇上誘惑時，到底係會搬出一堆藉口，抑或有嗰句講嗰句？王祖藍選擇了後者，話完「男人就係咁」再補多句「狩獵心態」，道出了女士們的感慨……
身為王太嘅李亞男是否需要擔心？又應該唔使，因為王祖藍有一個非常強勁嘅天然金剛箍，綁住了他的驕傲與風流……
舞台劇《唯獨祢是王II》講述大衛統一江山後，身為一國之君卻犯下極嚴重的姦淫與殺人罪。再次飾演大衛並且昇格為王，問到王祖藍望透過這次的舞台劇傳遞什麼訊息，他說：「一個好天真的小朋友，當進入社會、做皇帝之後，點都會變。同埋，點解當佢擁有一切時仲會覺得唔夠？人似乎就係咁，亦都特別提醒自己，今時今日我乜都有，點解仲係唔滿足？」近年在內地賺到盤滿缽滿嘅王祖藍，有車有樓兼有個華姐冠軍靚老婆，既感恩又無憾，他甚至認為「可以隨時返天家」，不過想到囡囡下月出世，他又改口：「可能做爸爸後又未必捨得走。」把興趣變為職業、得到認同又能創造工作機會予他人，王祖藍自覺幸福。
好先生最易「出事」
大衛雖然是一國之君，畢竟也是男人，面對誘惑，淪陷也是意料中事吧？王祖藍雖然唔高大靚仔，但也是男人，再加上他的娛樂事業，有女人埋身並不意外吧？更何況國內女子積極進取……但他說每次外出唔係同老婆就係同工作人員（又可稱為老婆線眼），所以女人埋身機會極微。「應該係話你先唔好容許自己有呢個機會，鬆半步就會鬆一步，鬆一步就會鬆兩步，話就話係試探，其實係唔好去面對。同埋照下鏡都知啦，貪你靚仔咩！男人喺嗰啲位會認為對方係欣賞自己才華、處事能力，我唔會咁諗。」王祖藍說時語氣頗為肯定，隨後再以婚姻書籍《當好男人遇見性試探》舉例，「好多時死嘅男人都係大家心目中嘅好先生，而呢類男人可能係有領導能力、受身邊嘅人歡迎、有幽默感……幾個特點都中我。」說畢連他自己也忍不住笑出聲。「所以我有乜都會同老婆講，因為一收埋就有機會成長，而見光就會死。」
曾經都係兵
咁到底遇過哪一種誘惑呢？王祖藍說是「鹹片」，並指現今科技發達，要睇好容易，再來就是女人。「有女仔搵我傾心事，我會同對方講明所有內容都會畀老婆知，甚至係叫埋老婆一齊出嚟傾，唔好有單獨相處的機會。好多人都死喺『朋友啫，無嘢嘅』之上。」王祖藍笑言自己外表沒有攻擊性，所以女人緣特別旺盛，但他也自知只能是眾多女人的水泡，不過這都已經是歷史了。「毒男係好清楚只能夠做觀音兵，但觀音兵變正印機會係好渺茫。」可曾做過兵？他說當然有過為拍拖而拍拖的階段，並「慶幸」自己唔係高大靚仔，否則死得人多，原來唔靚仔也可以是個優點，「我會視為金剛箍，綁住咗驕傲同風流，試問有錢又靚仔嘅，有幾難唔花弗？」
男人就係咁
談到早前有內地女星，因患上子宮頸癌加上有錢老公外遇，心灰意冷留下千字遺書指「嫁給垃圾」後選擇跳樓自殺。與對方素未謀面的王祖藍言談間變得十分感慨︰「佢遺書寫嘅男人就咁，外面更差嘅你都會同佢上床，因為你未上過，更難食都會食，因為未食過，男人就係咁！娶到華姐冠軍都可以唔滿足，因為未試過嘛，狩獵心態同埋攞獎牌咁……」男人講男人，道出了女人心聲與無限感概，絕世好男人／老公是否純屬虛構？「我同老婆講唔可以放心我，好多時女仔俾人呃就係因為太放心，只要佢信我，就可以由信任開始放肆，同時亦多咗空間去鬼混。拍部戲錫完留電話有幾難？隨時就可以，所以點解要老婆看住自己。」夫婦相處之道最重要是坦誠，相個王生王太在這項目上絕對做到滿分。「試過有朋友喊晒打嚟，咪聽下同鼓勵佢，亦有聽過明知道自己唔啱但說服自己係啱。」王太這天雖然未有參與訪問，但訪問結束後，王生在工作人員陪同下走到停車場，車門一開，腹大便便的李亞男原來已在車廂中……
王祖藍內地撈埋電影綜藝 帶挈香港CREW搵人仔：好想創造機會
場地：香港九龍貝爾特酒店
髮型：Ted Yeung@i i Alchemy hair & nail
化妝：K.T Tsui
Styling：Dicky Lee
服裝：Bettie Bespoke