【跳躍生命線】雄姐爆紅贊助商睇中 張彥博苦等13年終圓個唱夢

撰文:
最後更新日期:

張彥博憑無綫劇集《跳躍生命線》「雄姐」一角成功俘虜一班視迷,演技大獲好評,雖然「雄姐」在劇集中執行職務時不幸殉職,讓很多觀眾始料不及,認為死得唔抵,角色雖然短暫,能引起共鳴最為重要。

不講不知,原來張彥博入行經已13年,05年與馮嘉輝、伍德耀組成男子組合《赤子樂隊》,只維持3年約滿後便解散,13年參加藝員訓練班後正式加入無綫,當中曾參演過《一屋老友記》、《2013快樂男聲》電視劇。

張彥博憑《跳躍生命線》「雄姐」一角人氣急升。

苦等13個年頭,今年因劇集《跳躍生命線》令人氣急升,帶契「雄姐」終於趕上尾班車,將在12月9日於九龍灣國際展貿中心star hall舉行首個個唱《Good Day · 張彥博演唱會2018》,可以話是死都死得有價值。

張彥博接受香港01訪問時說:「好感恩Tvb畀機會我,多謝珍姐(曾勵珍)及監製方駿釗畀一個咁好嘅角色我發揮,令到觀眾認識我,劇集播完之後,有日收到投資方打電話畀我,話有個場地空置咗出嚟,問我夠唔夠膽開個演唱會?當時我諗咗好幾日,因為始終都係一個演唱會,只得三個星期去準備,時間非常緊迫,但在我演藝生涯裡面,呢一個係千載難逢嘅機會我唔想浪費咗,所以到最後我決定用盡全力去做呢個演唱會,將我係呢十幾年嚟係娛樂圈所經歷嘅事變成一個故事,同大家分享我係音樂嘅心路歷程。」

 

雖然只得三個星期準備,時間非常緊迫,務求在演唱會有好表現給大家欣賞,彥博日夜不斷練歌。

38歲的張彥博一直堅守著自己的理想,苦走多少個春與秋,難聽的說話也聽過,但赤子的心從未動搖,堅信有日終衝破命運困鎖,達成自己的夢想走到終點。

彥博感觸說:「苦等咗13年,終於可以願夢,百般滋味在心頭,好多時候同朋友食飯,佢哋會話我:『唔好發夢啦,睇你玩咗咁多年都仲未有起色,𠴱個都上晒岸啦又有車又有樓,睇下你咁多年仲做梗啲乜嘢?』有時候自己都會喺度諗,連食餐飯都會就住就住使,𠴱一刻會反問自己係咪好傻呢,仲捱梗每個月幾千蚊人工,但對於我嚟講都付出咗咁多年,未行到尾我又唔甘心,覺得好對唔住自己,過程雖然是好辛酸,但我都覺得值得,因為好多人未必可以經歷到咁多關於自己喜愛嘅工作,好多人想要一啲機會都冇,我覺得我非常之幸運。」

 

彥博透露演唱會邀請嘉賓馬神(馬德鐘)、Hanjin(陳奐仁)及一眾《跳躍生命線》兄弟出席到場支持。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。