【萬千星輝】入行近半世紀 72歲劉江首度入圍視帝：冇諗過會咁！
無綫（TVB）《萬千星輝頒獎典禮2018》將於12月16日（星期日）晚上舉行，當晚的重頭戲絕對是今年「最佳男主角」和「最佳女主角」誕生時刻，其中以視帝爭奪戰最為激烈。提名名單正式出爐後，外界均將焦點由袁偉豪、陳展鵬和王浩信等大熱門，轉到突然殺出的《大帥哥》張衛健身上，而睇漏了另一個重點──今年72歲、人稱「劉老師」的劉江，憑《平安谷之詭谷傳說》「谷爺」角色，首次入圍「最佳男主角」。
劉老師接受《香港01》訪問時直言沒有想過自己的名字，能夠在視帝的提名名單上出現：「我尋日（23/11、提名名單公布日）我就知喇，我都冇諗過會咁，我係男主角？浩然（黃浩然）先係啦！」
從影接近半世紀的劉老師在70年代由電影圈轉戰電視圈，先後在佳視、麗的工作，到1982年他便開展了無綫拍劇的生涯，亦在《萬千星輝頒獎典禮2013》中獲得了「傑出演員大獎」，多少的風浪也都見過，就是未試過提名「最佳男主角」，對於首次獲提名，劉老師指自己奪獎機會其實不大，不過都好多謝觀眾、公司仍然記得他這個角色：「屋企人都笑我陪跑！（同高層拉票？）唔會拉票啦，我都不理世事嘅，同埋入行都幾十年喇，咩都睇慣晒。（睇慣啲咩？）大家心照啦，哈哈！」
提到今年視帝候選人個個都猛料，屬於大熱門的《天命》陳展鵬、《兄弟》王浩信亦曾經勇奪「最佳男主角」，問劉老師怎樣看待這班競爭對手，他即笑謂：「佢哋仲有進步空間。（有咩進步空間？）即係佢哋仲後生呀，正如我都仲有進步空間咁，哈哈！講真，我有時真係會演唔到自己想要嘅效果，咁當然最緊要係盡力去做。」
講到劉老師有打算退休，他坦言已經開始減少工作量：「好老實講，已經去到呢個年紀，返工返到好夜，兩三點幾仲要揸車返屋企真係好攰，咁當然啦，我都仲好鍾意做戲嘅，有時喺屋企睇電視見到其他演員做戲，都會諗如果呢個角色係我做都幾唔錯。」
順帶一提，劉老師是歷屆台慶頒獎禮中最年長的「最佳男主角」入圍演員，打破了當年68歲的鍾景輝在《萬千星輝頒獎典禮2005》中憑《甜孫爺爺》入圍「最佳男主角」的紀錄。