【專訪】入行12年留守無綫等機會 許文軒：起碼開到個人節目先走
夢想與現實到底有多大的差距？從娛樂新聞記者到節目主持，許文軒（Edmond）一直默默耕耘至今，已經踏入第十二個年頭。但其實Edmond早在大學時期，已參加《全球華人新秀歌唱大賽（悉尼區選拔賽）》，並成功贏得冠軍和「最佳台風獎」兩個獎項，更與紅遍內地的陳偉霆一起參加《全球華人新秀歌唱大賽總決賽》。但為何Edmond最後沒有當成歌手，反而做了娛樂主播呢？
無心插柳贏獎 回港遇上花姐與陳偉霆
「我由頭到尾都唔覺得自己唱歌好聽！嗰陣有朋友叫我試吓，之後就連過幾關，最後贏咗，攞埋個台風獎，真係搲爆頭。」Edmond笑言自己在澳洲悉尼科技大學修讀室內設計期間，偶然際遇下，再加上老土劇情，最後參加了《全球華人新秀歌唱大賽（悉尼區選拔賽）》並贏得冠軍。
講起當年的比賽，Edmond仍記憶猶新，他笑稱：「贏咗之後，隔咗一個月就返嚟香港參加全球總決賽（2003年）。當時花姐係總決賽嘅導演，當時都會鬧吓人，話你哋班友都唔係比賽，嗰陣真係唔覺得係比賽，大家都玩得好埋。（陳偉霆都喺度？）係呀，佢嗰時跳舞已經好叻，我同其他人喺排舞室係等睇佢表演。我哋仲估計佢會入三甲，仲心諗個跳舞獎係咪為佢而設，但最尾佢都輸咗，攞唔到，所以呢個比賽係冇黑幕。」當年冠軍是來自三藩市的唐雅明，而Edmond則獲得殿軍。
比賽後收卡片 家中突傳噩耗即返澳洲
除了稱陳偉霆當時已經很亮眼，Edmond還大爆當年歌唱比賽的趣事：「比賽嗰陣好搞笑，好多唱片公司坐喺台下揀人，會有好多卡片飛埋嚟。監製都會介紹啲經理人畀我哋識，會收卡片之後再約。（當時算唔算收得多卡片？）都有啲卡片㗎。」正常Edmond在考慮與經理人洽談時，家裡突然傳出噩耗，Edmond感觸地說：「咁比賽完，我哋去慶功嘅時後，我就收到屋企人電話。佢哋同我講Daddy有病，因為驚影響我比賽所以一直都冇話我聽，係癌症。嗰陣都唔係好識反應，因為都冇遇過呢啲事。但第二日我就要飛返澳洲，Daddy叫我返去讀書先，因為要準備化療。讀多一、兩個月就放暑假，就一路陪住屋企人。所以，當時都停咗冇再諗唱唔唱歌，都冇時間諗。」
無悔繼續讀書 Edmond：簽咗都唔代表你得！
在暑假期間，Edmond再次返到香港並抽時間與經理人見面。當時的經理人提議Edmond放棄學業，回港準備訓練及出道。但家人希望Edmond先完成學業後再考慮，Edmond最後亦選擇尊重家人的想法，繼續升學。被問到會否後悔這個決定時，Edmond仍堅持說道：「從來都冇，要我再行多次都會讀書先。同埋你簽咗都唔代表你得，大把人唔得啦。」其後，在學期間，Edmond亦先後在澳洲中文廣播電台及網上電台節目主持。
重提橫店「打人」事件 多謝網友還自己清白
畢業以後，適逢TVB娛樂新聞台公開招募主播，Edmond就膽粗粗去面試並成功在一千名應徵者中脫穎而出。但入行不久，在一次被派往橫店追訪謝霆鋒及張栢芝復合消息期間，Edmond被有線娛樂新聞台一名女導演聲稱被TVB娛樂新聞台的攝影師及主持許文軒推倒受傷，有線的導演回港後指控該台，並到醫院驗傷。最後，從網上片段得知女導演所言失實，還Edmond清白。問及此事，Edmond笑言：「嗰陣仲喺橫店，冇啦啦公司打嚟話我打人，完全唔知發生咩事。我咪問幾時打人？邊日？因為完全都冇公安搵過我，但公司都要了解返咩事，我都照直講真係冇，總之都多謝網友還清白。」
認留在大台機會多：有嘢做唔係應該開心咩？
雖然做娛樂主播壓力大，還不時要出埠探訪藝人，但Edmond一做便是12年。不少娛樂主播辭職又轉行，但Edmond就一直認為留在公司發展機會大：「雖然有諗過放棄，但我覺得TVB發展機會大，可能差啲運氣。做主持或者音樂上，成功感都大。（屋企人都支持？）支持，雖然有時啲親戚會問我『乜你仲喺度做呀？』我心諗仲喺度做有咩問題，我冇嘢做先至有問題，有嘢做唔係應該開心咩？不過我都好感激屋企人，因為就算我唔係俾好多錢屋企，都冇出過聲，一直都好支持我想做嘅嘢。」
曾籌備個人節目 胎死腹中感可惜
除了做娛樂主播，Edmond亦希望有朝一日擁有一個屬於自己節目，他稱：「我都有諗過開啲音樂節目，都試過度晒成嚿古仔（報道）要點做，準備開，但最後中間胎死腹中，會懷疑自己冇運。（咩類型節目？）入行4、5年已經想搞，想做以前歌手，叫《好久不見》。當時嘉賓都約晒，仲搵得好辛苦，好似黃翊當年根本冇出過嚟，就直接打去佢間鋪，點知又真係畀我搵到佢，仲應承話拍，我連每個鏡頭都send埋俾佢睇，但最後都好可惜拍唔到。」
金像獎紅地毯 楊千嬅叫加油
雖然如此，但Edmond亦未曾這個夢想更笑言：「會堅持，起碼要開到節目先走。」而令Edmond一直堅持的另一原因，就是一班藝人前輩對自己的照顧，他稱：「關心妍都叫過我唔好放棄，最近採訪《多功能老婆》黃浩然突然間講話千嬅成日都播你啲片，心諗我啲片？黃浩然就話佢開劇成日會播我啲片，千嬅都知我唱歌，其實佢好早之前知道我想參加《星夢傳奇2》，但最後冇開到，但佢嗰陣知我有參加，竟然喺金像獎紅地毯叫我加油。」
場地提供：小喇咩