【救妻同學會】簡淑兒海報劇照活動都唔見影 粉絲震怒留言鬧爆

撰文:洪曉璇
出版:更新:

曾幾何時香港都有唔少青春劇,《Y2K》、《四葉草》系列捧紅唔少青春偶像,不過近年以年輕藝人掛帥嘅劇集已經買少見少。TVB周日時段新劇《救妻同學會》,被網友稱為隱藏版台慶劇,一班30歲以下演員擔崗演出,預告片亦拍出青春氣息,令網友相當期待。不過有份參演嘅簡淑兒,喺海報、劇照、甚至首次公開宣傳活動都不見蹤影,引起無限聯想。

《救妻同學會》》今晚(11月25號)八時三十分首播,每集連播兩小時。(IG圖片)
簡淑兒都有喺FB及IG宣傳新劇首播嘅消息。(簡淑兒FB)

TVB新劇《救妻同學會》重啟周日劇集時段,喺11月25號晚八時三十分首播,每集連播2小時。一班主要演員年齡都喺30歲以下,劇集自開拍起於網上重點宣傳主攻年輕人市場。近年被受網友追捧嘅簡淑兒(Jessica)都有份參演,拍攝時都有分享唔少花絮照,但嚟到劇集真係出街,海報、劇照、甚至首次公開宣傳活動都不見其蹤影,有傳因為Jessica非TVB親生女所致。

劇集早期宣傳中見到,簡淑兒係六位主要女角其中一員。(IG圖片)
愈接近劇集播出,大合照通常只剩下五男五女,Jessica唔見影惹來無限聯想。(IG圖片)

2012年參加香港小姐入行,及後成為組合少女標本成員之一,Jessica經理人合約屬GME,同TVB只有部頭合約關係,有傳因為咁令《救妻同學會》宣傳時都未見其蹤影。唔少Jessica粉絲深感不滿,於劇集官方IG洗版問偶像點解被冷待「又冇簡淑兒? 小編成日話特別角色,我覺得係只系大客串」

明明寫住終於齊人影大合照,但11人當中只有Jessica喺海報未見蹤影……(IG圖片)

官方IG亦有直接回覆大家嘅疑問:「以小編嘅認知,客串人物只會係一個時空出現,客串亦無分大小,簡淑兒同郭子豪都係特別角色,會一齊穿插係兩個時空入面,但就唔係佢地十個長期居留嘅人,到時候劇集出街就會知道點解。故事藍本亦唔係小編負責同控制,我每次見到簡淑兒都會同大家分享去盡量滿足你地嘅要求,希望大家可以以和諧並且用一個欣賞嘅態度去支持救妻同學會同簡小姐,再一次感謝你對救妻同學會的支持!」原來Jessica只係客串,咁成件事好似合情合理噃,希望佢檔期配合到都多啲一齊宣傳,咁粉絲就最開心啦。

面對網友洗版問簡淑兒去咗邊,官方回覆原來Jessica同郭子豪都係客串。(IG截圖)
+13
你可能感興趣