吳日言冒險催生誕女 拒無痛分娩經歷12小時陣痛:好似發咗場惡夢

撰文:
最後更新日期:

吳日言自宣布懷孕後一直洋溢幸福氣息,但到中期仲發現有妊娠糖尿,要每日自行注射胰島素控制病情,之前拎住一大樽數百個針頭,真係睇見都覺得辛苦,媽媽認真偉大呀﹗11月25號係阿Yan 35歲生日,呢日佢仲宣佈囡囡Beatrice出世啦﹗佢接受《香港01》訪問時透露生產時好似來回地獄又折返人間一樣:「經歷12個鐘嘅陣痛,感覺好似發左一場惡夢,但夢醒後我得到一份好大嘅禮物。」

吳日言順產誕下囡囡Beatrice。

阿Yan分享咗四張照片,見到Beatrice咀細細相當清秀,新手父母望住囡囡流露無限愛意。阿Yan接受《香港01》訪問時話:「囡囡順產出世重6.6磅,似邊個呀?好似一日似我一日似老公哈哈。」其實Yan患上妊娠糖尿揀順產生BB,都係冒住極大風險:「醫生建議Bea係38至39週出世,可能有好多媽媽會選擇開刀,一了百了。但係如果我唔試催生而直接開刀,Bea就連試順產出世嘅機會都冇。即使我知道Bea有臍帶纏頸問題,而催生都未必成功,甚至最尾我可能要食一個大全餐,但係我覺得去試總有機會,呢一種陣痛只有媽媽先知,我要好好記得佢。醫生亦比好多信心我,大前提係BB安全為先。」

懷孕時阿YAN患上妊娠糖尿,要每日自行注射胰島素控制病情,呢一大樽數百個針頭全部都係見証﹗

生仔十級痛,仲要無了期唔知幾時先到終點令孕婦相當絕望,而阿Yan就勁,拒絕使用無痛分娩直接挑戰十級痛楚:「入產房到BB出世,經歷12個鐘嘅陣痛,感覺好似發左一場惡夢,但夢醒後我得到一份好大嘅禮物。我冇選擇無痛分娩,鎮痛只靠聞笑氣。老公一直在旁支持我,不停同我報告鎮痛數字,鎮痛指數達到127感覺好似死去活來,我這輩子都會記得呢個數字。」

一家三口都係11月生日,真係相當有緣,以後可以齊齊慶祝啦。

「過了10小時,BB心跳突然跌落80情況並不樂觀,,真係千鈞一髮,再過多幾分數都未生出,就應該要開刀。我當時冇諗其他嘢,只係諗住用力用力,隱約聽到一班醫護人員嘅同老公為我吶喊,指導我忍氣用力倒數10聲。原來BB位置和臍帶問題影響出生,不過最後醫生嘅經驗和果斷為我順利誕下BB,聽到BB嘅喊聲非常感動,不過我冇落淚因為我已經筋疲力盡。原來該刻我嘅血壓指數好低,要喺產房休息兩個鐘。」阿Yan話生仔就好似跑左三次馬拉松,全身肌肉都好痛好攰,不過母女平安一切都好值得。

Beatrice出世重6.6磅,阿Yan笑言暫時都睇唔出似爸爸定似媽媽。

阿Yan依家有女萬事足,係佢今年最好嘅生日禮物。

+3
+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。