貓奴鄭秀文與流浪貓一見如故 與許志安冒雨買罐頭折返餵飼好有愛

撰文:
最後更新日期:

香港地愛貓愛狗之人相當多,朝夕相對就如家人一般親厚。鄭秀文同許志安結婚5年,一直未有生小朋友,但家中相當熱鬧,分別有愛犬Lucky以及愛貓肥米,對流浪動物佢地一樣上心,最近Sammi同安仔跑步期間遇上一隻疑似流浪貓,一見如故仲買貓糧餵飼,網友都大讚佢地好有愛心呀﹗

鄭秀文本身育有一隻愛貓肥米。(鄭秀文IG)

今年5月份Sammi曾經出post,原來佢哋屋企附近有鄰居過身,留低貓貓Coco,佢同安仔知道呢件事後,肩負起照顧Coco嘅責任,輪流帶去睇醫生,又喺大廈停車場幫Coco起咗個安樂窩。直到Coco離世亦安排寵物善終將佢火化,當時已經有好多網友大讚佢哋有愛心。

今年五月Sammi曾經於IG分享,同安仔照顧鄰居留下嘅流浪貓Coco。(鄭秀文IG)

尋日Sammi同安仔結伴跑步時,遇上一隻啡白色流浪貓,通常流浪貓會對陌生人有戒心,但對Sammi好似特別有好感,圍住Sammi轉又用身體不停磨,氹得Sammi非常開心:「在雨中如常跑步,但在路上卻遇上一隻非凡的小花貓,牠完全不怕人(不怕我),相對來說有點小熱情,mi猜,牠不停咪咪叫又團團轉,牠應該有點肚餓……於是,我們決定開車去龐物店買些貓糧。雖然仍𣎴太肯定牠是否完全因為肚仔餓而狂叫……」

Sammi同安仔雨中跑步時遇上流浪貓,好似一見如故非常親近。(影片截圖)

見到大雨下貓咪完全無地方避雨避風,令Sammi安仔都好心痛:「mi又沒有食物在身,儘最快的時間,買了貓糧回到現埸,牠沒有走開啊!牠一看到,九秒九走過來,就開始猛吃。看著牠吃,我們心稍為安了。我們亦同時發現原來已有「有心人」在山邊留下食物和水給牠。謝謝這有心人對流浪貓的關愛。心頭暖喛暖的啊!回到家中,仍會想起這花貓。看著牠吃得飽好開心好安慰。」網友留言大讚佢地好有愛心,呼籲佢地不如收養貓喵,俾浪浪一個溫暖嘅家。

安仔同Sammi馬上去買貓糧再折返,Sammi仲細心用手撥鬆貓糧,方便浪浪進食。(影片截圖)



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。