【亞洲小姐】去韓國只影散Shot好縮皮？　顏子菲：我當年去中山咋

有些東西，值得等的話，等一生都肯，而顏子菲亦終於等到了。昨日（29/11），在2008年奪亞洲小姐亞軍的顏子菲終於獲亞視安排，在簡單而隆重的儀式中補領亞姐后冠，與2011年冠軍馮雪冰一起完成多年來的心願，至於2018亞洲小姐競選香港賽區冠軍梁雪瑤、亞軍張右雨和季軍林孜沫亦有同場見證。

后冠同港姐爭太遠？　「冇得比」

「等咗10年喇，人生有幾多個10年？」顏子菲接受《香港01》訪問時坦言獲頒后冠意義重大，因為入行之後，家人都非常擔心她的前程，最緊張她收入是否穩定，現在終於可以有「實質嘢」讓他們睇睇。

其實顏子菲獲頒的后冠是福泰珠寶贊助，由水晶所製約值5位數字，與港姐近年頒發、有880粒鑽石值400多萬的后冠有一段距離，「同港姐嘅冇得比啦，最緊要係有紀念價值，如果我真係恨鑽石，我之後努力搵錢買畀自己都得，唔使等人哋送畀我。（等咗10年覺得好耐？）又唔係嘅，只係覺得時間過得好快，參選亞姐原來已經係10年前嘅事。」

會將后冠傳給未來女兒

問之前是否已經打定輸數，覺得自己已經沒有機會拎返后冠？顏子菲笑指自己10年來都沒有特別想過這個問題：「而家幾好吖，好有驚喜，如果第時係生女，等佢大咗、嫁人，個后冠就可以係家傳之寶咁送畀佢。其實今次可以補頒個后冠畀我，都係因為之前我幫今屆亞姐宣傳時，大會主動向我提出呢樣嘢。」

今屆去韓國只拍花絮縮皮？　「我當年去中山咋」

提到亞視復活後舉行的亞姐比起以往的聲勢弱，問作為師姐會否感到唏噓，顏子菲說：「我覺得班佳麗會唔開心過我，10年前我參選幾乎隔日就見到記者，我明白而家嘅環境畀過去唔同，我唔知資金有幾多啦，但都可以利用一下網絡力量去做啲嘢，當然，我都冇咩資格去教人。」

今屆亞姐的確搞得頗為「縮皮」，一班決賽候選佳麗原定到韓國接受集訓，但疑似因為資金問題，臨時改為到韓國拍「散Shot」、「花絮」。對此，顏子菲笑說：「有得去韓國咪好囉，我嗰年去中山咋！不過，10年前同20年前比都好唔同，個時勢都唔同咗，ATV個Brand又唔同咗，所以望就望佢做得返好。」