【是咁的，法官閣下．劇透】肢解犯同饒大狀有關　大結局仲有人死

《是咁的，法官閣下》今晚將播出最後一集，不過，估唔到都仲有人死，而呢個仲要係殺人及肢解屍體案疑犯之一嘅阿鬼（陳志健飾）！

阿鬼一直做晒大龍鳳尋親，被警察拘捕更認謀殺雙親，冷血得令人髮指，之不過，點解阿鬼會走上成魔之路，陳志健接受電話訪問時表示：「佢認為無極端的對與錯，因為有啲嘢野發生令佢價值觀扭曲，而佢角色係會對應返傑哥，因為佢童年同我都發生咗啲事，令大家在精神壓力上有偏差，而我嘅爆發點就係老師。佢令我去偏離咗自己想做嘅嘢，覺得所有人都對佢唔好，最後走上一個好極端嘅位置。之不過，佢自殺並唔係想將罪名推比Bell，純粹係覺得玩夠。」陳志健指阿鬼小時候經常被欺負，加上父母對佢莫不關心，直到老師的出現，如同天使一樣對他時呵護備至，但老師後來受傷住院，不知情的阿鬼有感被離棄，於是開始成魔。而在陳志健的角度來看，阿鬼是一個很會計算的人，就好似分屍時，都先等Bell落手。「就算真係被捕，佢都可以有藉口，而喺後期佢只係想同班差人玩，玩票性質多於其他嘢。」

陳志健當初收到劇本時，監製有告知劇情以真實案例為藍本，而他亦有上網看過相關新聞報導。「都有諗過參照一啲前輩做聰明犯罪者時，呼吸或者小動作等，但到現場同導演傾完之後，其實都感受到氣氛，同埋其實劇本真係寫得好，阿鬼有講過呢個世界其實都係一個監獄，有錢可以住靚監獄，與其都係捱，不如早啲解脫，所以佢殺父母都係想幫佢地早啲解脫，當入咗戲嘅時候，好自然會諗到點去發揮。」雖然肢體父母案呢個單元只得幾集，但陳志健並不介意戲份多少，認為無論係監製、導演抑或編審都希望做好呢件事，令佢覺得一定要支持。