周聰玲大讚周潤發光宗耀祖 認同其捐全數身家:係一種福報

撰文:
最後更新日期:

發哥周潤發向來貼地,為人友善,一點沒有巨星的架子,因此深受大眾愛戴。而近日,發哥姐姐周聰玲接受電台節目《舊日的足跡》訪問時,大談發哥在生活中的一面,更對弟弟讚不絕口。

不講不知,原來玲姐曾經做過娛樂記者,見證著發哥一路成長,玲姐也為這個弟弟的成就感到驕傲,她表示發哥靠自己「發憤圖強」才闖出一片天:「好開心囉,光宗耀祖,一個窮鄉僻壤嘅地方,能夠闖出去國際,又可以去到荷里活,真係數埋香港沒幾個嘅,好開心,因為人呢,呢種精神話畀你聽呢,只要肯拼肯捱就OK喇。」

玲姐比發哥大8歲,兩姊弟有一個共同的愛好,就是攝影。玲姐是拍攝蜻蜓的專家,曾獲得國際沙龍攝影展銅獎,舉辦過個人作品展。(VCG)

發哥出道多年,即使貴為天王巨星,但一直以來都非常親民,主動揸機同大家影相,對此玲姐笑言:「佢好隨和,因為佢永遠記住一樣嘢:『嗰啲戲迷就係我米飯班主』,個個見到佢好開心,好似屋企人一樣嘅,完全冇隔膜嘅,佢嗰種性格好似打成一片咁樣嘅。」發哥對粉絲都這般親切,對家人自然更是百般照顧,他還曾經為玲姐置業,令玲姐也相當感動,直言自己已經身在福中,要學識感恩。雖然玲姐未曾開口多謝發哥,但她指一切在心中,還透露發哥非常重視親情,每個星期都會請家人飲茶:「其實無言感激啦,因為一個親人能夠照顧到你咁好呢,你已經係一種福氣,因為依家啲人,好多親人各分東西,佢能夠咁好,照顧你,媽媽又久唔久下出嚟飲下茶,我呢啲家庭嘅聚會又係佢召集,好難得嘅,因為我細佬呢,係一個好睇重親情嘅人,為咗搵食冇法子,各有各嘅崗位。」

玲姐在節目上大談發哥生活中的一面,對弟弟讚賞有加,簡直「好到冇得頂」。(RTHK)

雖然發哥獲獎無數,身價也早已億億聲,不過生活依然平凡樸實,玲姐稱其是返璞歸真,甚至超然:「生活簡單中不簡單,平法中不平凡,呢啲叫超然呀嘛,至人無己,神人無功,聖人無名,呢幾句金句佢攞到囉,依家已經升華咗,叫波若智慧喇。」

對於發哥過世後捐出全數身家的舉動,玲姐更是相當讚同:「好似諾貝爾咁啦,將啲錢擺喺度做基金,捐畀全世界發明最top嗰啲人。最緊要對於呢個世界有貢獻、有益呀,所以永垂不朽,呢種精神叫博愛,有錢之外仲要學識呢樣,要回饋社會,世界係共用。」同時,玲姐也恭喜發哥,笑稱「有咗個香港嘅諾貝爾,嗰啲錢又帶唔走,所以畀多啲人受惠,呢啲係一種福報嚟嘅。」

發哥曾經說過世後會捐出全數身家,玲姐對弟弟的這一舉動也非常讚同,稱這是一種福報。(VCG)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。