【救妻同學會】朱智賢演出有驚喜 矇眼逃生勁刺激:最驚碌落山

撰文:
最後更新日期:

無綫周日劇集《救妻同學會》開播2集,雖然搵嚟胡鴻鈞、劉佩玥等年輕演員,但由於劇集不停穿插兩個時空,令唔少觀眾都睇到有啲亂。之不過,亂還亂,但仍有網民發現於劇中飾演Milan一角嘅朱智賢(Ashley)演出有驚喜。朱智賢於2013年落選港姐後,隨即加入大台並憑《3日2夜》獲封為新咪神,近年主攻主持嘅佢,拍劇機會寥寥可數,但喺第2集《救妻同學會》中,朱智賢一次過試晒飛車、綁架、鬧交戲,唔少網民都讚佢有樣有演技,並謂睇唔出佢拍劇經驗唔多。

朱智賢於《救妻》第二集由頭帶來落尾,她表示很擔心自己演技會整衰Milan呢個角色。

朱智賢接受電話訪問時,坦言劇集播出前非常擔心自己演技會惹來負評。「今次係第二次正式拍劇,戲份亦都比較重,都有壓力,但好在大家都正評,呢樣係無諗過,所以好surprise。自從《3日2夜》後,大家將我同性感拉埋一齊,即係朱智賢就係性感,性感就係朱智賢,就算近期已經無參與《3日2夜》,都似乎擺脫唔到呢個形象,所以劇集出街後,係真係好開心,因為網民唔再focus喺我身上,而係演技,好似打開咗演藝事業新一頁咁。」一直恨拍劇嘅朱智賢笑言自己雖有不少進步空間,但仍希望不久將來會以不同的角色同觀眾見面。

朱智賢懷疑胡鴻鈞有份綁架自己,第三集將會交代更多。

提到劇中的綁架戲份,朱智賢指拍攝前因落大雨令山路變泥路,加上自己沒有方向感,所以超擔心「逃生」時會碌落山。「同埋現實我唔會畀人綁,所以一方面會恐懼,但另一方面都有少少刺激。」劇中朱智賢與姚瑩瑩呢位後親母感情要好,但其中一幕講述朱智賢發現爸爸帶埋小三返屋企,令姚瑩瑩要入住朱智賢宿舍,二母女因而發生爭執,作為新人,要同前輩吵大鑊,緊張程度拍得住被綁架。「嗰幕開劇無耐就拍,好多嘢都未上手,同埋又要培養情緒,所以好緊張,好在瑩瑩姐超nice,無架子無態度,拍之前陪我練習,埋位又再排幾次先正式roll機,佢令到成件事都好好多。」

「自己要咁惡去鬧一位前輩都有啲唔好意思。」

+13
+12
+11


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。