【大帥哥】張衛健改對白一句變十句　徐榮佩服：佢有江湖地位！

無綫重頭劇《大帥哥》12月3日正式開播，相信大家在觀賞劇情同時，都留意到劇中對白十分之抵死又有張衛健的影子，例如預告片當中，5分鐘內讀完100多個字的對白就是其一。今晚劇集首播，一班演員齊聚一起「電視撈飯」，順路慶祝洪永城的生日。兄弟班之一的徐榮接受《香港01》訪問時就表示，自己第一次見到張衛健的時候是在幾年前無綫的頒獎禮上。徐榮說：「我心諗，如果可以同佢拍一套戲就好啦，幾年後聽到佢返嚟拍劇，跟住就知道自己有份，我嗰時真係好開心。」

徐榮續說，他十分佩服張衛健（Dicky）：「我自己好鍾意佢個拍嘢方式，佢到現場將個劇本對白反咗佢。例如一向簡單對白：『我要殺咗你！』變成『我會將你劏開肚，擺啲雞腸鵝腸蝦腸落去，捲起佢，吊乾風乾加鹽，再慢火炆。』（真係有呢句？）係吖！好多呢啲㗎，大家睇啦。」徐榮更表示，張衛健會將改好的對白在聊天群組預先通知，實在是非常有心兼有才華，更謂：「我哋最多可以將一句對白變成另一個句對白，但係佢可以將，一句對白變成十句對白，呢個唔係個個做到，又改得靚嘅，呢個唔係個個做到，都要靠佢功力同江湖地位。」

談及拍攝時的趣事，徐榮話拍攝場地張衛健（Dicky）喺拍攝現場開咗間「張記士多」，喺一個Corner位日日都有無限量零食飲品供應，搞到佢哋拍完劇之後就肥晒，不過Dicky自己就日日淨係食蕉。