苗僑偉囡囡苗彤唔排除拍港劇 :如果有機會會考慮

撰文:冼燕珊
出版:更新:

三哥囡囡苗彤(Phoebe)今日(5/12)同爸爸苗僑偉一齊出席活動,長駐加拿大嘅Phoebe難得返嚟香港一個月,嚟緊去台灣,為一間澳洲公司拍攝旅遊節目。

苗彤今日難得同老竇三哥一齊出席活動。(葉志明攝)

本身係攝影師嘅Phoebe,掌鏡嘅同時亦係演員同model,唔知佢有冇興趣返嚟香港發展?「暫時冇呢個打算,因為都冇打算返香港住,因為都係想留喺加拿大,所以都係喺嗰邊做嘢方便。(TVB有冇邀請你拍劇?)如果有好嘅機會都會考慮,但暫時未有。」

Phoebe話如果有好嘅角色同機會,都會考慮返香港拍劇。(葉志明攝)

三哥係公認嘅型男,3歲少女至80歲阿婆都係佢fans,問到Phoebe會唔會想同老竇拍劇,佢就話興趣唔大,「冇特別想同佢合作,因為公還公,私還私,佢係受歡迎,但佢係我daddy,唔一樣。」