【兄弟.專訪】江嘉敏修煉6年「冷眼術」:一定有人覺得我樣衰!

撰文:
最後更新日期:

無綫(TVB)台慶劇《兄弟》裏面的江嘉敏(Kaman)牙尖嘴利,說話有如機關槍般連珠爆發,原來這個角色設定與她的真人差不多。「其實呢個係毛病嚟,我到而家都仲改緊,講嘢好似子彈咁快,快到係自己Dubbing(配音)時都聽唔到自己講嘢,幾大鑊!個人好心急!」由細到大都咁急?「係呀,我行步路都快過人。」

18歲至24歲 演藝人生兩倍速

今年24歲的江嘉敏的確比起其他人行得急、行得快,不是講步速,而是說人生步伐。6年前,18歲的她便已經在「鮮浪潮」得獎短片、譚惠貞執導的《野犬與貓咪》中飾演角色「家貓少女」,翌年開始接拍廣告,到2014年便在大銀幕上亮相,為麥曦茵作品《曖昧不明關係研究學會》演出。這個年紀的少年少女,大多都是在學校念書,讀一些未來或者用不着的理論、文章。

江嘉敏在TVB台慶劇《兄弟》中飾演馬斯婷,是王浩信的私人保鑣,一開始兩人都互相看不起對方,之後因為慢慢了解而變得關係良好,兩人更有感情線,是一對歡喜冤家。(陳順禎攝)

新晉與資深的分野 一種情緒百個模樣

係咪快就好?「我而家知道一心急就會做錯嘢,或者做得唔好。」江嘉敏坦言不少前輩都笑她講對白太快,提她首要任務是做足角色的感情、動作,對白可以慢慢來。雖然確有不少進步空間,但她的表現在新一代演員裏面已經相對而言稱得上好,只是缺乏一些經驗,江嘉敏亦清楚這個問題:「經驗唔夠多,做出嚟個情感就唔夠豐富,可能我對開心嘅認知得10種,但係允龍、楊明同浩信就覺得開心可以多好多層次,30種、100種,唔係就咁擺個表情出嚟。」她認為這個便是「新晉演員」和「資深演員」的最大分野。

江嘉敏其實非常用功,又聽從幕前幕後前輩教導,逐點逐點改善自己的演戲技巧,她最近迷上了內地真人騷《演員的誕生》:「我睇到要Jot筆記!」她發現「傷心」這個情緒是有時間性,隨時間一日一日的過去,所表現的感覺、表現都會有不同:「假如我屋企人已經唔喺度,尋日走咗同走咗十年嘅都唔同,所以要演戲時分析埋呢樣嘢。」(陳順禎攝)

真的「戲屎」? 江嘉敏懶得管:做咩都有人唔鍾意

在這個人人都有一把口,搶着發表意見,不求深度的世代裏面,一個未成熟、表現未到位的演員,在觀眾眼中便是一個不合格的演員,「戲屎」便是他的「最中肯」評價。除非是天才、有演戲天分,一個演員在起步時期都好難避免被指「戲屎」,亦都好難不為此不傷心,似是否定你一路以來付出過的努力,以一句說話把你判刑,但江嘉敏已經逼自己急急跳過了這個階段:「正如一定會有人覺得你靚,一定又會有人覺得我樣衰,永遠有正面同反面,無論我做咩都會唔鍾意,但你都會有鍾意你嘅人,點解要為一小撮唔鍾意你嘅人去改變你自己,搞到本身鍾意鍾意你嘅人唔鍾意你。」

當然,網民對於江嘉敏的最大指控一定不是她「戲屎」,而是一路以來一些毫不根據、穿鑿附會的惡意中傷。《親親我好媽》(2017)播映時,有聲稱是江嘉敏中學同學的網民便列出一些關於她的「秘密」,包括她幾度留級未有畢業、多次騙人錢財甚至甘願出賣肉體。到《兄弟》拍攝時,她被指介入拍檔王浩信和太太陳自瑤之間的婚姻,更因為在Instagram上傳了一張寫有「喂呀」的手機爆Mon相,而被網友鬧爆她「心地差」、「示威」和「落井下石」,當中更夾雜了不少粗口。

江嘉敏直言最初的夢想,並非是做演員,亦非少女夢寐以求的香港小姐:「我係想做宇宙統治者,因為我唔想有欺凌呢個情況出現,呢個情況無論係做嘢同讀書都有發生過,其實大家都係生存喺呢個空間,點解要欺負一個比你弱小嘅人?」(陳順禎攝)

戀愛滋潤大過天 惡意攻擊放埋邊

「唔通人哋用粗口鬧你,你又用返粗口鬧人咩,係咪先?」以「得啖笑」來形客上述指控的江嘉敏,不覺得自己是啞忍,只是覺得有時候應該選擇睇完就算:「明明你係扶阿婆過馬路,佢都會夾硬話你推阿婆出街,做咩都會有人話,都會覺得你唔好,有時真係會唔開心,我兩個阿妹都會叫我唔好睇呢啲留言、新聞。」她覺得仍在就學的兩個妹妹都比起自己成熟,更加明白事理,清楚知道若把這些負面評論、新聞放在心裏,好難不受其影響:「到時影響做戲,對其他人發脾氣係冇意思,要做嘅係發揮自己優點,令鍾意你嘅人更鍾意你,本身唔識你、中立嘅人鍾意你。」

大多數戀愛中的女人,眼中都只有戀愛,可能便是因為這個原因,江嘉敏都不將這些惡言惡語放在眼內。講起戀事,早前被踢爆與電競公司高層Anthony拍拖的她便坦言沒有諗過這樣快便公開:「始終男朋友都唔係圈內人,我本身都想佢同佢屋企人有個心理準備,之前都同佢講過到時公開咗,實會有人鍾意、有人唔鍾意,點都會有人談論,咁而家公開咗都開心嘅,心情都放鬆啲。」最起碼,一些不實指控都能夠不攻自破。

眼見好姊妹劉穎鏇重返校園,江嘉敏坦言自己都有這個想法:「如果係讀APA(演藝學院),我應該會讀音樂,阿媽由細到大畀咗好多錢我去學,但係門檻好高,好似話要識兩樣樂器,兩樣都要8級,而我淨係識彈琴。」做乜唔學戲?她坦言都有心郁郁:「出面都有好多班但係好貴!(你搵到錢啦!)唔使供兩個妹讀書咩?」(陳順禎攝)

+3
+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。