【大帥哥】觀眾激讚拎硬視帝? 張衛健:我習慣咗冇獎攞

撰文:
最後更新日期:

由張衛健(Dicky)、蔡思貝(Sisley)、洪永城(Tony)等主演的無綫劇集《大帥哥》自今個星期一(3日)播出之後便好評不斷,今日(8日)一班主演就齊齊亮相活動,為劇集造勢。眼見短短5日已經引起好大迴響,Dicky也坦言很開心:「我都係想拍一部戲,香港人啦同埋掛住Dicky嘅人啦,包括其他地方啦,大家睇得開心。咁我係幾Expect嘅一樣嘢就係第一集已經有幾大反應,咁我覺得呢樣嘢就好開心,我更加開心我睇到有網民寫啦,話『喂你知唔知呀健仔,我哋好耐冇試過一家人一齊坐喺度睇電視』。」Dicky見到這條留言後,發現自從平板電腦同智能電話普及之後,一家人除了一齊吃飯,其他時間就各顧各,完全不交流:「我哋以前係坐埋一齊睇電視㗎嘛,咁如果我呢部戲係可以凝聚到一家人一齊睇電視,一齊感動,一齊笑,咁我覺得係作為一個演員,喺名與利以外嘅一個好大價值,好開心。」

《大帥哥》在TVB同內地Youku網同步播放,Dicky表示到今日才播出5集,但點擊率已經差不多有8千萬,希望到星期一的時候可以去到1億。(葉志明攝)

雖然《大帥哥》是Dicky相隔22年再參與拍攝的無綫作品,但一出馬就令劇集備受讚賞,不過Dicky表示自己不會因此加大拍劇的工作:「其實唔止TVB添,即係反應好,多謝大家,咁但係唔代表我會好快再拍戲啦,或者再拍好多戲啦。」Dicky說幾個月前蘇志威問他「有冇諗過邊一部戲會係最後一部戲?」但其實連他自己也不知道:「以我自己嘅性格我隨時都有可能最後一部戲,即係可能我會做到真係做唔郁喇,冇人想請我拍戲喇,冇人想睇我喇,我先至唔做都唔定,但我亦都有可能突然間有一日就扯起條筋,唔拍喇咁,我自己都唔知道。」

Dicky表示不會因為《大帥哥》受歡迎而加量拍劇。(葉志明攝)

下星期日(16日)就是《萬千星輝頒獎典禮2018》,《大帥哥》入圍多個獎項, Dicky也獲提名最佳男主角,而且呼聲好高,對於有無信心拎獎,Dicky笑言:「呢樣嘢真係…...令我回想我演咗咁多年戲,其實喺演藝方面呢,我印象中係冇咩點攞過獎嘅,我習慣咗喇,冇獎攞我習慣咗,但我覺得真係最緊要,喺觀眾心目中如果我係半個影帝半個視帝咁,我已經好開心喇。」其實有不少網友表示即使Dicky無獎拎,但已經是他們心目中的視帝,Dicky聞言後也說「哇,呢句就乜都值得啦。」真是甜在心中。

Dicky講笑話幾年前由吳國敬作曲,黃偉文填詞的《大獎》開頭第一句就是「人人拿大獎得我沒有」……(葉志明攝)

今日凌晨Dicky在微博上載一張同太太張茜在海邊相依偎的背影相,並配文寫到:「我答應過的是,我說到做到!等我忙完這一輪的工作,我會陪你度過一個又一個的日落日出。」令粉絲誤以為他有隱退的打算,「唔知呀,我自己都唔知呀,冇諗太多,即係我嗰句說話都唔係代表要退出嘅,唔係嘅,只不過真係要多啲時間陪屋企人,係真嘅。」就到聖誕節,不知道Dicky有無計劃同太太旅行呢?「聖誕節有工作要做,做完之後呢,因為我係天主教徒,每年我都會去聖堂『子夜彌撒』嘅,今年聖誕節都一樣。」

至於聖誕禮物,Dicky笑言「不停咁送啦」,他稱不會特別去party,或者送禮物等等。(葉志明攝)

+3
+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。