【TNF 100】黃德斌初試22公里越野跑賽:標準時間內完成就OK!

撰文:林迅景
出版:更新:

「2018 The North Face 100 Hong Kong 」今日正式開跑,是次以「Green Race」作為主題,並與環保團體長春社合作,設計出一系列的綠色賽事方案。大會早年已要求參賽者自攜盛水器皿,以避免製造大量的如即棄水杯等的塑膠廢物。

黃德斌話今日天氣好好,好啱跑山:「好在而家4點幾個天仲係咁藍,希望天未黑晒之前上到第一個山個啦,哈哈。」(黃國立攝)

「2018 The North Face 100 Hong Kong 」除了吸引了一眾來自世界外地熱愛「跑山」的運動好手之外,更吸引了熱愛運動的黃德斌參加。據知,今次越野賽可算是黃德斌的「處男」比賽,他接受《香港01》訪問時笑說:「冇㗎,今次純粹係嚟體驗下,觀摩下。(馬拉松呢?)冇㗎,除咗讀書時期參加過校運會之外,就冇參加過任何賽事。」不過,黃德斌表示今次只是「小試牛刀」,100公里組別就比較困難,所以只是跑22公里賽事挑戰自己。

黃德斌話發哥係佢越野跑嘅教練,今次德斌終於可以測驗下訓練三個月嘅成果啦。(網上圖片)

談及今次參加賽事的原因,黃德斌說:「今年4月嘅時候,就跟住發哥跑山,之後就跑咗條癮出嚟。又咁啱朋友介紹咗個操體能嘅教練畀我,佢就同呢班跑山嘅專家好熟,就一齊訓練。我有時間就會去聽下佢哋訓練,跟住我個教練就同我講:『不如試下啦!我幫你報名,你可以睇下自己訓練嘅成果。』所以,我咪試下囉。」畢竟今次是黃德斌的「處男」跑山比賽,同時又是國際級盛事,到底黃德斌有無信心跑出好成績呢?他回答說:「佢有最低限度嘅完成時間嘅,咁我梗係想喺標準時間完成到,就OK㗎啦,哈哈。」

問及黃德斌衣服上英文字「TRA」的解釋,他解釋說:「係North Face嘅Trail Running Academy咁解。」(黃國立攝)

訪問中提及,當初黃德斌開始「跑山」的原因是因為周潤發(發哥)。問起黃德斌與發哥成為跑友的原由,他說:「嗰時我係跟佢行山嘅,但係行山都唔夠佢行,佢行我都追佢唔到嘅,到知道佢開始跑,就好奇一齊跑下啦。(佢叫埋你定自薦?)自薦嘅,因為佢都唔知我得唔得閒㗎嘛。得咪一齊跑囉,邊個嚟佢都Welcome㗎。佢係我其中一個教練嚟㗎,佢係最先教我跑山㗎。(發哥跑山有幾快?)佢好犀利㗎,智叔都好犀利,方中信都好犀利,我係最渣嗰個嚟㗎,哈哈。(發哥佢哋通常跑邊度?)每個星期都會去跑唔同嘅山,咁先好玩吖。(要野生捕獲發哥咪好難?)係吖,香港咁多山,你真要通山搵。(邊個搵路線?)梗係發哥啦,發哥係香港嘅山主嚟,去到邊都會同我哋講呢個山嗰個咩山。」

黃德斌今次真係全副「武裝」,除了衣物之外,還有飲用水、頭燈、銀哨等。黃德斌:「比賽最緊要安全,因為跑山吖嘛!」(黃國立攝)
黃德斌開始跑啦!(資料圖片)
+10